პერსონალურ მონაცემთა დაცვის სამსახურის განცხადებით, პირადობების ჩამორთმევა სისხლის სამართლის კოდექსით გათვალისწინებული ქმედებაა და ასეთ შემთხვევებზე რეაგირება სამსახურის კომპეტენციის ფარგლებს სცდება.

უწყების თქმით, ბათუმელების მიერ გავრცელებული ინფორმაციის საფუძველზე, ამ მედიის სტატიაში ამომრჩევლების მონაცემების დამუშავების თაობაზე მითითებული ფაქტის შესწავლა უკვე დაიწყეს.

"პერსონალურ მონაცემთა დაცვის სამსახურს გააჩნია საზედამხედველო ფუნქცია — გააკონტროლოს საქართველოში "პერსონალურ მონაცემთა დაცვის შესახებ" საქართველოს კანონით დადგენილი წესების შესრულება, ხოლო სისხლის სამართლის კოდექსით განსაზღვრულ დანაშაულის შემცველ ქმედებებს შეისწავლიან და რეაგირებას ახდენენ სამართალდამცავი ორგანოები. მოცემულ შემთხვევაში, ვინაიდან ამომრჩევლებისთვის პირადობის დამადასტურებელი დოკუმენტების ჩამორთმევა სავარაუდოდ საქართველოს სისხლის სამართლის კოდექსით გათვალისწინებულ ქმედებას წარმოადგენს, მასზე რეაგირება სცდება სამსახურის კომპეტენციის ფარგლებს და სამართალდამცავი ორგანოების ფუნქციას განეკუთვნება. ამასთანავე, გვსურს საზოგადოებას ვაცნობოთ, რომ არც ერთი განცხადება და მომართვა, რომელიც სამსახურის კომპეტენციის ფარგლებში, საარჩევნო პროცესში პერსონალური მონაცემების დამუშავების კანონიერების შესწავლის მიზნით იქნა წარმოდგენილი, რეაგირების გარეშე არ დარჩენილა. შესაბამისად, სამსახური მიმდინარე რეჟიმში სწავლობს აღნიშნულ პროცესში "პერსონალურ მონაცემთა დაცვის შესახებ" საქართველოს კანონით დადგენილი წესების სავარაუდო დარღვევის არაერთ ფაქტს", — ვკითხულობთ განცხადებაში.