აშშ-ის სენატის საგარეო ურთიერთობათა კომიტეტის წევრის და ევროპისა და რეგიონული უსაფრთხოების თანამშრომლობის ქვეკომიტეტის თავმჯდომარის ჯინ შაჰინისა განცხადებით, ორპარტიული ქართველი ხალხის აქტის მხარდაჭერას კიდევ 10 სენატორი დაემატა.

კერძოდ, კანონპროექტს მხარდაჭერა გამოუცხადეს სენატორებმა: ტომ ტილისმა, მიტ რომნიმ, ჯეფ მერკლიმ, ჯონ კორნინიმ, კრის მერფიმ, დენ სალივანმა, საერთაშორისო რესპუბლიკური ინსტიტუტის (IRI) თავმჯდომარემ, ანგუს კინგმა, ტოდ იანგმა, შელდონ უაითჰაუსმა და ჯორჯ ჰელმიმ.

"მოხარული ვარ, რომ სენატში ჩემი კოლეგების მნიშვნელოვანმა ნაწილმა მხარი დაუჭირა ქართველი ხალხის აქტს და გააცნობიერა, რომ საქართველოში არსებული ვითარების გადადება არ შეიძლება. ერთად ვაგზავნით მკაფიო გზავნილს, რომ არსებობს ჩვენი კანონმდებლობის მყარი ორპარტიული მხარდაჭერა, ქართველი ხალხის ევროატლანტიკური მისწრაფებების მიმართ ჩვენი მხარდაჭერა და საქართველოს მიმართ ჩვენი პოზიცია უცვლელი დარჩება, მიუხედავად იმისა, რომელი პარტია გააკონტროლებს ვაშინგტონს", – განაცხადა სენატორმა შაჰინმა.

სენატის საგარეო ურთიერთობათა კომიტეტის წევრის ჯიმ რიშის განცხადებით, სენატორები აღიარებენ ქართველი ხალხის სურვილს ევროინტეგრაციისკენ.

"ეს კანონპროექტი კონგრესიდან მკაფიო გზავნილს გზავნის, რომ აშშ ერთიანია ქართველი ხალხის მხარდაჭერაში მათი ტრანსატლანტიკურ თანამეგობრობაში მომავლის ძიებაში. ჩვენ ვაღიარებთ ქართველი ხალხის სურვილს ევროინტეგრაციისკენ და მზად ვართ, გავატაროთ აშშ-ის პოლიტიკა, რომელიც მხარს დაუჭერს მათ შესაძლებლობას, მიაღწიონ ამას", - განაცხადა სენატორმა რიშმა.

ცნობისთვის, ამერიკის შეერთებული შტატების სენატის საგარეო ურთიერთობათა კომიტეტმა 25 სექტემბერს გაავრცელა ინფორმაცია, რომ სენატში ქართველი ხალხის აქტის შესახებ მოსმენა გადაიდო. ამ დროისთვის უცნობია, როდის გაიმართება მოსმენა.