რუსეთის კანონები, რომლებიც ბევრ აქტივისტს, მედია ორგანიზაციას და ინდივიდს აიძულებს "უცხოელ აგენტებად" დარეგისტრირდნენ, თვითნებურია და ადამიანის უფლებებს არღვევს. ამის შესახებ ევროპის ადამიანის უფლებათა ევროპული სასამართლოს გამოქვეყნებულ გადაწყვეტილებაშია საუბარი. ინფორმაციას ონლაინ გამოცემა barrons.com აქვეყნებს.

"კანონმდებლობა იყო სტიგმატიზებული, შეცდომაში შემყვანი და გამოიყენებოდა ზედმეტად ფართო და არაპროგნოზირებადი კუთხით", — წერს სტრასბურგის ადამიანის უფლებათა ევროპული სასამართლო.

ევროპელი მოსამართლეების მტკიცებით, რუსეთის კანონების მიზანი იყო დასჯა — დაშინება და არა გამჭვირვალობის რაიმე სავარაუდო საჭიროება, ან ეროვნული უსაფრთხოების შესახებ ლეგიტიმური შეშფოთება.

საქმე 107-მა მოსარჩელემ აღძრა, მათ შორის არიან არასამთავრობო ორგანიზაციები და მედიის წარმომადგენლები, მათ შორის, აღსანიშნავია უფლებადამცველი ორგანიზაცია მემორიალი, რომლის კვლევის სფეროა საბჭოთა დანაშაულები, ასევე რადიო თავისუფალი ევროპა და რადიო თავისუფლება.

საქმეზე "შპს რადიო თავისუფალი ევროპა/რადიო თავისუფლება და ანდრეი შარი რუსეთის ფედერაციის წინააღმდეგ" ადამიანის უფლებათა ევროპულმა სასამართლომ მიიღო გადაწყვეტილება, სადაც ნათქვამია, რომ რუსეთის ხელისუფლებამ დაარღვია ადამიანის უფლებათა ევროპული კონვენციის მე-10 და მე-11 მუხლები, რომლებიც ეხება სიტყვის თავისუფლებას და გაერთიანების თავისუფლებას. ინფორმაციას რადიო თავისუფლება აქვეყნებს.

რადიო თავისუფლების ინფორმაციით, სასამართლომ დაადგინა, რომ რუსეთის მოქმედი კანონმდებლობა "უცხოეთის აგენტების" შესახებ ახდენს სტიგმატიზაციას, არის შეცდომაში შემყვანი, ძალზე ფართოდ და არაპროგნოზირებადი სახით გამოიყენება და, ზოგადად, მიზნად ისახავს დასჯას და არა არასამთავრობო ორგანიზაციების გამჭვირვალობის გაზრდას. ცალკეა მითითებული რუსეთის ხელისუფლების მოთხოვნაზე, მარკირებულ იქნეს ე.წ. "უცხოეთის აგენტების" მიერ გაკეთებული ყველა პუბლიკაცია. ეს და სხვა შეზღუდვები, როგორც ნათქვამია ევროსასამართლოს გადაწყვეტილებაში, ძირს უთხრის დემოკრატიული საზოგადოების საფუძველს.
ადამიანის უფლებების ევროპულმა სასამართლომ დაადგინა, რომ რუსეთის ხელისუფლებამ უნდა აუნაზღაუროს რადიო თავისუფლებას და ანდრეი შარის ხარჯები დაახლოებით 60 ათასი ევროს ოდენობით, ასევე აანაზღაუროს პირდაპირი ზიანი დაახლოებით 950 ათასი ევროს ოდენობით.

რადიო თავისუფლების ხელმძღვანელობამ არაერთხელ განაცხადა მედიაორგანიზაციის მტკიცე გადაწყვეტილების შესახებ, ნებისმიერ პირობებში გააგრძელოს მუშაობა რუსეთში.

რუსეთის ხელისუფლება აგრძელებს რადიო თავისუფლების ჟურნალისტებისთვის პროფესიული მოვალეობის შესრულებაში ხელის შეშლას. მედიაკორპორაციის რუსულენოვანი რედაქციის რამდენიმე ათეული თანამშრომელი ფიზიკური პირის სახით არის შეყვანილი "უცხოური აგენტების" სიაში.