აღმაშენებლის გამზირზე კაფე-ბარები პროტესტის ნიშნად 14-მა მეპატრონემ დაკეტა. მათ გადაწყვეტილება მას შემდეგ მიიღეს, რაც მერიამ ღია სივრცეში მოწყობილი კაფეების აღება მოსთხოვა.

უცხოელი ინვესტორები

ერთ-ერთი თურქი ინვესტორი რუსთავი 2-თან საუბრისას ამბობს, რომ მას საქართველოში ბიზნესის კეთება სურდა, თუმცა "მუშაობის უფლებას" არ აძლევენ.

"რატომ არ გვაქვს ჩვენ მუშაობის უფლება, როცა სხვები მუშაობენ?" - ამბობს ის და დასძენს, რომ საქართველოს დატოვებს.

გაფრთხილება ყველა ღია კაფეს არ მიუღია, თუმცა მერია აცხადებს, რომ მსგავს მითითებას სხვა კაფე-ბარებსაც მისცემენ.

თბილისის მერიის ზედამხედველობის სამსახურის წარმომადგენელი გიორგი ნინიძე რუსთავი 2-თან საუბრისას ამბობს, რომ მათ კაფე-ბარები მფლობელები ეთნიკური ნიშნით არ შეურჩევიათ.

მერიის განცხადება

თბილისის მერია აცხადებს, რომ მითითება სულ 16 სუბიექტს მისცა, საიდანაც 12-მა, გაფრთხილების შესაბამისად, ღია კაფე სრულად გააუქმა, 2-მა ნაწილობრივ, ხოლო 2-ს ამ დრომდე ქმედება არ განუხორციელებია.

მერია აცხადებს, რომ აღმაშენებლის გამზირზე მდებარე ღია კაფეები უნებართვოდ იყო მოწყობილი.

უწყების პრესსამსახურის ცნობით, 16 სუბიექტიდან 7 კაფე-ბარის დამფუძნებელი და ხელმძღვანელობაზე პასუხისმგებელი პირი ქართველია, ხოლო 9 - უცხო ქვეყნის მოქალაქე.

მერია აცხადებს, რომ მას შემდეგ, რაც აღნიშნული პირები თბილისის მერიის შესაბამის სამსახურებში ღია კაფეების მოწყობისთვის სავალდებულო პროცედურებს გაივლიან, ისინი კანონით დადგენილი წესის შესაბამისად, საქმიანობის გაგრძელებას შეძლებენ.