24 სექტემბერს ანტიკორუფციულმა ბიურომ სახიფათო გადაწყვეტილება მიიღო: ბიუროს ხელმძღვანელმა, რაჟდენ კუპრაშვილმა, საერთაშორისო გამჭვირვალობა საქართველო და ორგანიზაცია აირჩიე ევროპა გაცხადებული საარჩევნო მიზნის მქონე სუბიექტებად ცნო. შესაბამისად, ორივე ორგანიზაციაზე გავრცელდა მოქალაქეთა პოლიტიკური გაერთიანების შესახებ ორგანული კანონის მესამე თავთ გათვალისწინებული შეზღუდვები.

ორგანიზაციის დირექტორებს, ეკა გიგაურსა და ხათუნა ლაგაზიძეს დაევალათ, 5 დღის ვადაში ბიუროსათვის წარედგინათ ფინანსური ანგარიშები და გაეხსნათ ინფორმაცია იმ საბანკო ანგარიშების რეკვიზიტებზე, რომელიც "საარჩევნო მიზნებისთვის" გამოიყენებოდა.

ხსენებული გადაწყვეტილება TI-მ სასამართლოში გაასაჩივრა და სტატუსის მოხსნა მოითხოვა, თუმცა 30 სექტემბერს ორგანიზაციამ გაავრცელა განცხადება, რომ თბილისის საქალაქო სასამართლომ ანტიკორუფციული ბიუროს გადაწყვეტილება არ შეაჩერა და, შესაბამისად, ორგანიზაცია 26 ოქტომბრის არჩევნებზე სადამკვირვებლო ფუნქციას ვერ შეასრულებდა.

ანტიკორუფციული ბიუროს ქმედებამ და მისმა შედეგმა არაერთი კითხვა გააჩინა ინსტიტუტის დამოუკიდებლობასთან და მიუკერძოებლობასთან დაკავშირებით, თუმცა რაჟდენ კუპრაშვილი კრიტიკას წინააღმდეგობით დაუხვდა და განაცხადა, რომ მისი გადაწყვეტილება რეპრესიული არ არის.

"ყველა მტყუანია, მე ვარ მართალი", — განუცხადა რაჟდენ კუპრაშვილმა მედიას

ამ განცხადებიდან რამდენიმე საათში, საქართველოს პრემიერ-მინისტრმა, ირაკლი კობახიძემ, სოციალურ მედიაში გამოაქვეყნა პოსტი, რომელშიც მოუწოდა ანტიკორუფციულ ბიუროს, რომ ხსენებული ორგანიზაციებისათვის გაცხადებული საარჩევნო მიზნის მქონე სუბიექტის სტატუსი მოეხსნა.

კობახიძის განცხადების გამოქვეყნების მომდევნო დღეს, 2 ოქტომბერს, "დამოუკიდებელმა" ანტიკორუფციულმა ბიურომ გაითვალისწინა პრემიერის "თხოვნა" და დააკმაყოფილა ის.

საერთაშორისო გამჭვირვალობა — საქართველო სადამკვირვებლო საქმიანობას დაუბრკოლებლად შეასრულებს, თუმცა ჩამოთვლილი გადაწყვეტილებების მთელმა სერიამ კითხვები გააჩინა ანტიკორუფციული ბიუროს დამოუკიდებლობასთან დაკავშირებით, რადგან ევროკავშირის რეკომენდაცია, რომლის საფუძველზეც ინსტიტუტი შეიქმნა, მკაფიოდ მიუთითებდა მთავრობისგან დამოუკიდებელი ანტიკორუფციული ბიუროს შექმნაზე.

იყო რაჟდენი მართალი?

როგორც აღინიშნა, ანტიკორუფციული ბიურო 2022 წელს, ევროკავშირის რეკომენდაციის შესაბამისად შეიქმნა. რეკომენდაცია მოუწოდებდა სახელმწიფოს, შეექმნა დამოუკიდებელი ორგანო, რომელიც კორუფციასთან ბრძოლას უზრუნველყოფდა. მიუხედავად ამისა, 2024 წლის წინასაარჩევნო პერიოდში საზოგადოებამ მიიღო სამსახური, რომელიც არჩევნების წინ დამკვირვებელ ორგანიზაციებთან და ხელისუფლებისთვის არასასურველ პირებთან საბრძოლველად აქტიურად გამოიყენება.

ანტიკორუფციული ბიუროს ქმედებების შესაფასებლად, News.on.ge ყოფილი სახელმწიფო ინსპექტორის სამსახურის ყოფილ ხელმძღვანელს, ლონდა თოლორაიას, დაუკავშირდა.

შეგახსენებთ, 2022 წლის 1-ელ მარტს ქართულმა ოცნებამ დაჩქარებული წესით გააუქმა სახელმწიფო ინსპექტორის სამსახური. ინსპექტორის სამსახურის გაუქმებას მკაცრი კრიტიკა მოჰყვა, როგორც საერთაშორისო პარტნიორების ასევე სამოქალაქო ორგანიზაციების მხრიდან.

"ამ ყველაფრისთვის სამართლებრივი სახელის დარქმევა წარმოუდგენელია. პრემიერ-მინისტრს, მიუხედავად იმისა, რომ თავად ნიშნავს ამ თანამდებობის პირს, საერთოდ არ აქვს უფლება, მოუწოდოს რაიმე გადაწყვეტილებისკენ იმ სამსახურს, რომელიც კანონის მიხედვით, (თურმე) დამოუკიდებლობის სტანდარტებს აკმაყოფილებს.
როცა პრემიერ-მინისტრი ამ განცხადებას აკეთებს, შემდეგ კი ანტიკორუფციულ ბიუროს ეს გადაწყვეტილებაში პირდაპირ გადააქვს, ასეთი პროცესი სამართლებრივად წარმოუდგენელია — ანტიკორუფციული ბიუროს ხელმძღვანელი გამოვიდა და პრემიერის მოწოდების საფუძველზე გააუქმა საკუთარი გადაწყვეტილება, რომელიც საერთოდ არ უნდა მიეღო — კიდევ ერთხელ ვიმეორებ, არაუფლებამოსილი პირის მოწოდების საფუძველზე, დამოუკიდებელი ინსტიტუტის მხრიდან გადაწყვეტილების გაუქმება სამართლებრივი ნონსენსია", — განაცხადა ლონდა თოლორაიამ

ლონდა თოლორაიამ განიხილა რაჟდენ კუპრაშვილის მიერ გაკეთებული განცხადება იმის თაობაზეც, რომ მან გადაწყვეტილების გაუქმებისას დისკრეციული უფლება გამოიყენა.

"სად წერია, რომ მას ეს უფლებამოსილება აქვს, ან რა შემთხვევაში აქვს მისი გამოყენების უფლება. ხვალ და ზეგ სხვა ობიექტის მიმართაც გამოიყენებს თუ არა ამ ტიპის უფლებამოსილებას? ძალიან საშიში გადაწყვეტილებაა ყველა მხრივ: ერთი იმ კუთხით, რომ მითითების საფუძველზე იმოქმედა და მეორე, რომ სამართლებრივად სრულიად დაუსაბუთებელია როგორც თავდაპირველი გადაწყვეტილება, ისე ამ გადაწყვეტილების გაუქმება", — განმარტა ლონდა თოლორაიამ

ლონდა თოლორაიას თქმით, ანტიკორუფციული ბიუროს მიმართ უნდობლობა ისედაც არსებობდა, თუმცა ამ პროცესებმა სამსახურის მიმართ ნებისმიერ გულუბრყვილო ნდობას წერტილი დაუსვა.

საბოლოოდ, რაჟდენ კუპრაშვილი მართალი არ აღმოჩნდა.