გერმანიის კანცლერის, ოლაფ შოლცის, პარტიამ ბრანდენბურგის მხარის არჩევნებში გაიმარჯვა. თუმცა, პარალელურად, ულტრამემარჯვენე AfD გამარჯვებასთან ისტორიულად ახლოს მივიდა.

მემარცხენე-ცენტრისტულმა სოციალ-დემოკრატიულმა პარტიამ (SPD) ულტრამემარჯვენეებს, დაახლოებით, 1.2%-ით გაასწრო. ტენდენცია შოლცისთვის საგანგაშოა, რადგან ბრანდენბურგი, ტრადიციულად, სოციალ-დემოკრატიული პარტიის ციტადელია — 1990 წელს გერმანიის გაერთიანების შემდეგ ბრანდენბურგში პარტია არ დამარცხებულა. გარდა ამისა, კანცლერი ბრანდენბურგის მხარის ცენტრში, პოტსდამში, ცხოვრობს.

ეს ყურადღების ცენტრში მას შემდეგ მოექცა, რაც სექტემბრის დასაწყისში AfD პირველი პარტია გახდა მეორე მსოფლიო ომის შემდეგ, რომელმაც აღმოსავლეთ გერმანიაში, თიურინგიაში, არჩევნები მოიგო. იმავე დღეს, ულტრამემარჯვენე პარტია საქსონიაში მეორე ადგილზე გავიდა. ამ ფაქტს ოლაფ შოლციც გამოეხმაურა და მას "მწარე და შემაშფოთებელი" უწოდა.

ულტრამემარჯვენეობის ზრდა გერმანიაში

ბრანდენბურგის მხარეში AfD-ის წარმატება პარტიის პოპულარობის ზრდის ტენდენციას ხაზს უსვამს. ეს უკვე მესამე მხარეა, რომელშიც პარტიამ ხმათა მესამედი მოიპოვა. როგორც ჩანს, ამომრჩეველს არ აწუხებს ფაქტი, რომ გერმანიის სადაზვერვო სააგენტომ AfD-ის ბრანდენბურგის შტოს ლიდერსა და მთავარ კანდიდატი, ჰანს-კრისტოფ ბერნდტი, "მემარჯვენე ექსტრემისტად" შეაფასა.

მიუხედავად იმისა, რომ ფედერალური მიწის პარლამენტზე კონტროლი ვერ მოიპოვა, ულტრამემარჯვენე პარტია მეორე ადგილს პოლიტიკური გავლენის გასაზრდელად და მმართველი კოალიციისათვის მნიშვნელოვანი პრობლემების შესაქმნელად გამოიყენებს.

ბრანდენბურგის არჩევნები ბოლო იყო მომავალი წლის გერმანიის ფედერალურ არჩევნებამდე. შესაბამისად, მმართველ კოალიციას ცვლილებებისათვის ცოტა დრო დარჩა. შოლცის კოალიციის პარტნიორმა მწვანეებმა და თავისუფალმა დემოკრატიულმა პარტიამ (FDP) 5%-იანი ბარიერის დაძლევა ვერ შეძლეს, რის საპირისპიროდაც, 9 თვის წინ შექმნილმა სარა ვაგენკნეხტის კავშირმა (BSW) 13.5%-იანი მხარდაჭერა მოიპოვა. შესაბამისად, ოლაფ შოლცს რთული 12 თვე ელის.