გამანადგურებელმა წვიმებმა ვიეტნამში ნგრევა, მეწყერი და ხიდის ნგრევა გამოიწვია.

Al Jazeera-ს ცნობით, ტაიფუნ იაგის შედეგად გამოწვეულ მეწყერს 59 ადამიანი მაინც ემსხვერპლა.

მედიის ცნობით, ტაიფუნი იაგი მიმდინარე წლის ყველაზე ძლიერი შტორმია აზიაში, რამაც ჩინეთის და ფილიპინების განადგურების შემდეგ, ვიეტნამის ჩრდილო-აღმოსავლეთ სანაპიროსაც კატასტროფული შედეგი მოუტანა.

ვიეტნამის ჩრდილო-დასავლეთით ჰონგ ლი სონ-ის მთებში, მეწყრის შედეგად ექვსი ადამიანი დაიღუპა, მათ შორის, ახალშობილი ბავშვი და ერთი წლის ბიჭი.

ადგილობრივმა მაღალჩინოსნებმა საინფორმაციო სააგენტო AFP-ის აცნობეს, რომ მათი სხეულები კვირას იქნა აღმოჩენილი.

ჩრდილოეთ ვიეტნამში, ჰოა ბინჰის პროვინციაში, ძლიერი წვიმის შედეგად მთა ჩამოიშალა, რამაც სახლში მცხოვრები 4 ოჯახის წევრი ემსხვერპლა.

დღეს, 9 სექტემბერს ჩიაო ბანგ-ის პროვინციაში, ადიდებულ მდინარეში ჩავარდა ავტობუსი, რომელშიც 20 მგზავრი იყო.

ადგილზე მაშველები იყვნენ მობილიზებული, თუმცა იქ სადაც ინციდენტი მოხდა, მისვლა ვერ მოახერხეს, რადგან მეწყერმა გზა გადაკეტა.

ფუ ტო-ს პროვინციაში, წითელი მდინარის ადიდების გამო ფოლადის ხიდი ჩაინგრა — სამძებრო სამუშაოები ამ დრომდე მიმდინარეობს.

Al Jazeera წერს, რომ 10 მსუბუქი და სატვირთო მანქანა და ორი მოტოციკლეტი მდინარეში ჩავარდა. მდინარიდან სამი ადამიანის ამოყვანა და საავადმყოფოში წაყვანა შეძლეს. თუმცა, ამ დრომდე 13 ადამიანი კვლავ დაკარგულია.

ვიეტნამის მთავრობამ განაცხადა, რომ ქვეყნის რამდენიმე ნაწილში შტორმმა ელექტრომომარაგებისა და ტელეკომუნიკაციის საშუალებები დააზიანა.

ტაიფუნმა, ქვეყნის ჩრდილოეთით, დაახლოებით 3,330 სახლი და 120,000-ზე მეტი ჰექტარი სახნავ-სათესი გაანადგურა.

იქამდე, სანამ ტაიფუნ იაგი ვიეტნამს მიუახლოვდებოდა, სამხრეთ ჩინეთსა და ფილიპინებს გადაუარა, რასაც შედეგად 24 ადამიანი დაიღუპა და მრავალი დაშავდა.

ივლისში გამოქვეყნებული კვლევის თანახმად, რეგიონში ტაიფუნები სანაპიროსთან უფრო ახლოს ყალიბდებიან, უფრო სწრაფად ძლიერდებიან და, კლიმატის ცვლილების გამო, უფრო ხანგრძივად რჩებიან ხმელეთზე.