"ირაკლი კობახიძის ნათქვამი — 2030 წელს ერთიანი საქართველო, აფხაზეთისა და სამხრეთ ოსეთთან ერთად შევა ევროკავშირში, აბსოლუტურად ბოდვითი და აბსურდული განცხადებაა", — ამის შესახებ ინტერპრესნიუსთან კონფლიქტოლოგმა პაატა ზაქარეიშვილმა განაცხადა.

მისი თქმით, მმართველი პარტიის დათესილი ოპტიმიზმი, საქართველოს გაერთიანების შესახებ, პროპაგანდისტული და პოპულისტური პოლიტიკის ნაწილია.

"ამგვარი ოპტიმიზმი უსაფუძვლოა, მაგრამ არის ხელისუფლების პროპაგანდისტული და პოპულისტური პოლიტიკის ნაწილი. ერთადერთი ოფიციალური განცხადება, საქართველოს მხრიდან, რომელიც ამ თემაზე გაკეთდა და არის მკაფიო, არის პრემიერ ირაკლი კობახიძის ნათქვამი იმაზე, რომ 2030 წელს ერთიანი საქართველო, აფხაზეთისა და სამხრეთ ოსეთთან ერთად შევა ევროკავშირში. რუსეთი აქ ნახსენები არაა, არც კონფედერაცია არ არის ნახსენები.

ჩემი აზრით, ეს აბსოლუტურად ბოდვითი და აბსურდული განცხადებაა, რადგან მას არავითარი კავშირი არ აქვს რეალობასთან, რადგან მოლდავეთი ყველაფერს ასრულებს და 2030 წელს რომ ვერ მოხვდება ევროკავშირში, ამის შესახებ ორი დღის წინ ღიად ითქვა. ეს იყო ხელისუფლების ერთადერთი ოფიციალური განცხადება, დანარჩენი საუბრები ამ თემაზე, ექსპერტების მსჯელობა ამ თემაზე არის შედეგი იმ პროცესებზე რეაგირება, რაც სოხუმიდან, ან მოსკოვიდან მოდის.

სამწუხაროა, ის რომ იდეები, რაზეც ჩვენ აქ ვრეაგირებთ, ყალიბდება საქართველოს გარეთ, ან მოსკოვში, ან სოხუმში, ან ცხინვალში. შესაძლოა, ამ საქმეში ზოგიერთმა უცხოელმა ექსპერტმაც მიიღოს მონაწილეობა. მოკლედ, საეჭვო ნიადაგზე აღმოცენებულ იდეებზე ვახდენთ ჩვენ რეაგირებას", — აცხადებს ზაქარეიშვილი.

რაც შეეხება, აფხაზეთის დაბრუნების შესაძლებლობას კონფედერაციის გზით, კონფლიქტოლოგი ამბობს, რომ ამ თემაზე ოფიციალური განცხადებები ჯერ არსად გაკეთებულა.

"სამწუხაროდ, ამ თემაზე ჩვენთან არ საუბრობენ საჯაროდ. ერთადერთი საჯაროდ რაც გაიჟღერა, იყო ვოლსკის შეხვედრა კაფეში რუს ბიზნესმენ ხიდაშელთან. ხიდაშელს მაშინ წამოსცდა სიტყვა კონფედერაცია, რაც ვოლსკის ეს იდეა დიდი სიხარულით არ მიუღია და ამ იდეისგან დისტანცირება მოახდინა. სხვა რამ ქართველი პოლიტიკოსებისაგან არაფერი თქმულა. გარდა იმისა, რომ ივანიშვილი ჰიპოთეზურად საუბროს იმაზე, რომ ქართულ ოცნებას სჭირდება საკონსტიტუციო უმრავლესობა. ხელისუფლებას ახლა ხმები სჭირდება და არა კონფლიქტების მოგვარებაზე საუბარი.

ამიტომ იყო, რომ ხელისუფლებამ მოიგონა საუბრები ეკლესიაზე, ლგბტ საზოგადოებაზე, ოჯახის სიწმინდეზე, ნაცმოძრაობის დამარხვაზე და ასე შემდეგ. მათ შორისაა საზოგადოებაში ინერციით გააქტიურებული საუბრები ტერიტორიული მთლიანობის აღდგენაზე“, — განაცხადა ზაქარეიშვილმა.