ნიპტონი არაფრით გამორჩეული ქალაქია, თუ შეიძლება მას ქალაქი ეწოდოს. ის კალიფორნიისა და ნევადის შტატების საზღვარზე, მოჰავეს ნაკრძალთან მდებარეობს და სულ რაღაც 20 ადამიანი ცხოვრობს.

ნიპტონი 1905 წელს, ოქროს ციებ-ცხელების პერიოდში დაარსდა და თავიდან პერსპექტიულ ქალაქადაც ითვლებოდა, რადგან სან პედრო - ლოს ანჯელესი - სოლტ ლეიკ სიტის დამაკავშირებელი რკინიგზის ერთ-ერთი სადგური იყო. მაგრამ საბოლოოდ ვერ განვითარდა.

სამაგიეროდ, ახლა, 2017 წლიდან, მას შემდეგ რაც კალიფორნიაში რეკრეაციული მარიხუანა ლეგალიზებულია, ქალაქს ახალი სიცოცხლის შანსი მიეცემა.

კომპანია American Green-მა ქალაქის 48.5-ჰექტარიანი ტერიტორია და მასზე არსებული ყველა შენობა $5 მილიონად შეისყიდა და ამ ადგილას მარიხუანის კურორტის აშენებას გეგმავს. ქალაქი ბოლომდე მწვანე იქნება და მთლიანად განახლებად ენერგიაზე იმუშავებს.

American Green პროექტში $2,5 მილიონის ჩადებას გეგმავს. ეყოფათ თუ არა ეს ფული ტურისტების მოსაზიდად და კარგი ინფრასტრუქტურის შესაქმნელად, არ ვიცით, თუმცა არსებულზე ბევრად კარგი მდგომარეობა რომ შეიქმნება, ეს უდავოა.