კანონპროექტის მიღებას, რომელიც ინიციატორების თქმით, ქალთა უფლებების დაცვის კუთხით წინგადადგმული ნაბიჯი იქნებოდა, 10 ივნისის კენჭისყრისას 2 ხმა დააკლდა. სხდომაზე არ იმყოფებოდნენ თავისუფალი დემოკრატების, ნაციონალური მოძრაობისა და გირჩის დეპუტატები. პარტიები განმარტავენ მიზეზს, რატომ არ დაესწრნენ მნიშვნელოვანი კანონპროექტის კენჭისყრას.

ახალი პოლიტიკური ცენტრ გირჩის ლიდერი, ზურაბ ჯაფარიძე, პარლამენტში ფემიციდის შესახებ კანონპროექტის განხილვაზე, თავისი პარტიის წევრების არდასწრებას ფეისბუკში განმარტავს. როგორც ჯაფარიძე წერს, გირჩი ხმის მიცემასა და ქუთაისში ჩასვლას საღამოს აპირებდა, თუმცა, ვინაიდან კენჭისყრა დღის პირველ ნახევარში შედგა, ისინი ვერ დაესწრნენ სხდომას:

"გირჩი აპირებდა ხმის მიცემას და ოთხივე მივდიოდით ქუთაისში ამ კანონისა და გერმანული საარჩევნო მოდელის მხარდასაჭერად. ჩვენ გუშინ გვქონდა კომუნიკაცია პარლამენტის აპარატთან და ვიცოდით, რომ დღეს გამოდიოდა ეს საკითხები ამიტომ, შესაბამისად ვიცოდით, რომ საღამოს იქნებოდა კენჭისყრები. არ ვიცი რა მიზეზით, მაგრამ დღეს დილით ჩატარებულ ბიუროს სხდომაზე გადაუწყვეტიათ, რომ კენჭისყრები ჩაეტარებინათ შუადღისას".

ჯაფარიძე ასევე ამბობს, რომ აღნიშნულ კანონს შეეძლო ცნობიერება აემაღლებინა, მაგრამ რეალობას ვერ შეცვლიდა.

პარლამენტის სხდომაზე არდასწრების მიზეზს განმარტავს ნაციონალური მოძრაობის წევრი თინათინ ბოკუჩავაც. On.ge-სთან საუბარში მან განაცხადა, რომ ვინაიდან პარტია ბოიკოტის რეჟიმში იმყოფება, არ ესწრებიან პარლამენტის ვერცერთ სხდომას:

"ჩვენ ვართ ზოგადსაპარლამენტო ბოიკოტის რეჟიმში. სამწუხაროდ, აქედან გამომდინარე, ვერ ვესწრებით საკომიტეტო მოსმენებსაც კი".

ბოკუჩავას თქმით, ფემიციდის საკითხს ხელისუფლებამ უფრო მეტი პასუხისმგებლობით უნდა შეხედოს. მისივე აღნიშვნით, ხელისუფლების ქმედებები არათუ პრევენციულია ამ მხრივ, არამედ, პირიქით, ახალისებს მსგავს ძალადობრივ ქმედებებს.

"მე პირადად ძალიან დაინტერესებული ვარ და მივესალმებოდი ამ თემის განხილვას. სამწუხაროა, რომ ადამიანის უფლებათა კომიტეტის სხდომაზე არ ვიყავით და ძალიან არაკონსტრუქციული პოზიციები გამოითქვა მათ შორის კომიტეტის თავმჯდომარის მოადგილის, ბატონი გედევან ფოფხაძის მხრიდან".

On.ge ცდილობს დაუკავშირდეს პარტია თავისუფალი დემოკრატების წარმომადგენლებს, თუმცა ამ დრომდე მათთან დაკავშირება ვერ მოხერხდა.

რესპუბლიკელი დეპუტატების, თამარ კორძაიასა და თამარ ხიდაშელის მიერ ინიცირებული კანონპროექტი სისხლის სამართლის კოდექსში ფემიციდის, როგორც ცალკე მუხლად განსაზღვრის შესახებ, პარლამენტმა 10 ივნისს ჩააგდო. პროექტს მხარსადაჭერად 50 ხმა სჭირდებოდა და 48 მიიღო.

ინიციატივის თავდაპირველი ვერსიის მიხედვით, სისხლის სამართლის კოდექსს უნდა დამატებოდა 1081 მუხლი: ფემიციდი - გენდერული ნიშნით მოტივირებული ქალის განზრახ მკვლელობა.