ინგლისში, პეინტონის ზოოპარკში მატებაა — 2018 წლის შემდეგ პირველად, აქ ჩილეური ფლამინგოს შვიდი ფუმფულა ბარტყი დაიბადა. მათგან ერთ-ერთი კი უკვე ყველას ყურადღების ცენტრში მოექცა. საქმე ისაა, რომ იგი ორმა მამრმა ფლამინგომ, ართურმა და კერტისმა, გამოჩეკეს.

ფლამინგოებში ერთი და იმავე სქესის წყვილები იშვიათობას არ წარმოადგენს. პეინტონის ზოოპარკშიც ბევრი მამრი ფლამინგო დაწყვილდა შეჯვარების სეზონზე. თუმცა, მათ მიერ ბარტყის გამოჩეკა მაინც უჩვეულო ამბავია — ყოველ შემთხვევაში, ზოოპარკის თანამშრომელმა პიტ სმოლბოუნზმა არც იცის, როგორ აღმოჩნდა კვერცხი ართურთან და კერტისთან.

"სავარაუდოდ, კვერცხი უყურადღებოდ იყო ბუდეში დატოვებული, მათ კი ხელსაყრელი მომენტით ისარგებლეს", — ხსნის პიტი, — "ფრინველების განყოფილებაში ვიცით, რომ ფლამინგოებში, პინგვინებსა და სხვა სახეობებში ერთი და იმავე სქესის ინდივიდების დაწყვილება ჩვეული ამბავია. ასე რომ, ეს სიახლე შოკისმომგვრელი ნამდვილად არ ყოფილა, მაგრამ ამან ცოტათი მაინც გაგვაკვირვა".

შეჯვარების სეზონზე, წყვილები, როგორც წესი, დიდ დროს ატარებენ ერთად, მაგრამ მათი შეწყვილება მხოლოდ მაშინ დასტურდება, როცა ორი ფრინველი ბუდეს ირჩევს და მორიგეობით ჯდება კვერცხის გამოსაჩეკად. ასე მოიქცნენ ართური და კერტისიც. მსგავსი შემთხვევა კი იშვიათობაა, მაგრამ სხვა ზოოპარკებშიც მომხდარა ასე.

• ავსტრალიაში გეი პინგვინების წყვილმა კვერცხი იშვილა
• მამრმა პინგვინებმა პირველი ბარტყი გამოჩეკეს — წყვილი მშობლების ამპლუაში

ართურისა და კერტისის ბარტყი კი, რომელსაც ჯერ სახელიც არ აქვს, უკვე ერთი თვისაა. მშობლები, რასაკვირველია, ძალიან ზრუნავენ მასზეო, ამბობს სმოლბოუნზი. პატარა ფლამინგო თურმე სხვა ბარტყს დამეგობრებია და მასთან ერთად ერთობა ხოლმე, მოშივებული კი ისევ ართურს და კერტისს აკითხავს.

აღსანიშნავია, რომ ფლამინგოები მხოლოდ გამრავლების მიზნით არ წყვილდებიან. ბიოლოგი და ექსეტერის უნივერსიტეტის პროფესორი პოლ როუზი თავის კვლევაზე დაყრდნობით ამბობს, რომ ფრინველები გულდასმით ირჩევენ პარტნიორს, რომელთანაც დროის გატარება სურთ.

"მათი სოციალური ქცევიდან გამომდინარე, არ მიკვირს, რომ ორ მამრ ფლამინგოს წარმატებით გამოსდის ბარტყის გაზრდა", — ამატებს როუზი, — "თუმცა, არ მგონია, რომ ისინი პირველად დაწყვილდნენ".

ერთი და იმავე სქესის ფრინველების წყვილებს ველურ ბუნებაშიც შეხვდებით. მაგალითად, ალბატროსების რამდენიმე სახეობაში, მდედრი ინდივიდები ზოგჯერ ერთად ჩეკენ კვერცხებს, ან ცალ-ცალკე გამოჩეკენ და ბარტყებს ერთად ზრდიან. ეს პროცესი კი მოთმინებასა და ერთგულებას მოითხოვს: საინკუბაციო პერიოდი ალბატროსებისთვის, დაახლოებით, 60 დღე გრძელდება, ფლამინგოებისთვის კი — 28 დღე. ორნითოლოგი კევინ მაკგოუენი აღნიშნავს, რომ ფრინველებში ნაშიერის ყოლის სურვილი იმდენად დიდია, რომ გარემოებებს დიდი მნიშვნელობა არც აქვს, ასე რომ, ამ მიზნისთვის ზოგჯერ ერთი და იმავე სქესის წყვილებიც იქმნება.