ალტე უნივერსიტეტმა და ამერიკულმა New Jersey City University (NJCU)-მ თანამშრომლობის მემორანდუმი გააფორმეს, რომლის ფარგლებშიც ბიზნესისა და კომპიუტერული მეცნიერებების მიმართულებით ერთობლივი, ორმაგი დიპლომის საბაკალავრო პროგრამები შეიქმნება.

პროგრამები ორი უნივერსიტეტის კოორდინაციით მომზადდება და სტუდენტებს მისცემს უნიკალურ შესაძლებლობას, განათლება მიიღონ, როგორც საქართველოში, ისე ამერიკის შეერთებულ შტატებში. იმავდროულად, მონაწილეები აიღებენ ორ დიპლომს, შესაბამისად, ალტესა და NJCU-ის ოფიციალურ აკადემიურ აღიარებას მიიღებენ.

უნივერსიტეტების თანამშრომლობა ასევე მოიცავს გაცვლით პროგრამებს სტუდენტებისთვის, აკადემიური და ადმინისტრაციული პერსონალისთვის, აგრეთვე, ერთობლივი კვლევების განხორციელებას და საერთაშორისო სტანდარტების შესაბამისი აკადემიური გარემოს განვითარებას.

“მოხარულები ვართ, რომ ვიწყებთ New Jersey City University-სთან პარტნიორობას ბიზნესისა და კომპიუტერული მეცნიერებების ორმაგი ხარისხის პროგრამების შექმნის მიმართულებით. აღნიშნული პროგრამები სტუდენტებს უნიკალურ შესაძლებლობას მისცემს, მნიშვნელოვან საერთაშორისო გამოცდილებასთან ერთად, ორივე უნივერსიტეტის დიპლომი მიიღონ.

ორმაგი დიპლომის ეს მოდელი საშუალებას იძლევა, სტუდენტებმა აითვისონ გლობალურად კონკურენტული უნარები და ჩამოუყალიბდეთ ფართო საერთაშორისო ხედვა, იმისთვის, რომ წარმატებით შეძლონ სწრაფად ცვალებად, მუდმივად განვითარებად სამყაროში წარმატებული კარიერული წინსვლა.

გარდა ამისა, პარტნიორობა მოიცავს სტუდენტების და აკადემიური პერსონალისთვის გაცვლითი პროგრამების შეთავაზებას და ერთობლივი კვლევითი პროექტების განხორციელებას, რაც დაგვეხმარება აკადემიური ეკოსისტემის განვითარებასა და ინტერნაციონალიზაციაში.

ეს თანამშრომლობა მნიშვნელოვანი წინსვლაა ალტე უნივერსიტეტის სტრატეგიული მიზნისკენ, რომელიც მოიაზრებს საერთაშორისო აკადემიური შესაძლებლობების მუდმივად გაფართოვებას. ” — რამაზ კუკულაძე, ალტე უნივერსიტეტის პრეზიდენტი.

პარტნიორი უნივერსიტეტი — NJCU

New Jersey City University მდიდარი აკადემიური ისტორიის უნივერსიტეტია, რომელიც 1927 წლიდან, მსოფლიოს სხვადასხვა კუთხის სტუდენტებს სთავაზობს უმაღლესი ხარისხის განათლებას. უნივერსიტეტი ახორციელებს 59 საბაკალავრო და 31 სამაგისტრო პროგრამას და მიზნად ისახავს მომავლის ლიდერების მომზადებას, რომლებიც შეძლებენ მნიშვნელოვანი პოზიტიური ცვლილებების შეტანას, როგორც ნიუ ჯერსის შტატში, ისე მთელ მსოფლიოში.

ალტე უნივერსიტეტი

2002 წელს დაარსებული უმაღლესი საგანმანათლებლო დაწესებულებაა. ის ერთ-ერთი ყველაზე სწრაფად მზარდი კერძო უნივერსიტეტია საქართველოში. დღეს აერთიანებს ბიზნესის, საინფორმაციო ტექნოლოგიების, სამართლისა და სოციალურ მეცნიერებათა და მედიცინის საერთაშორისო სკოლებს. უნივერსიტეტში სწავლობს 2,500-ზე მეტი სტუდენტი 50-ზე მეტი ქვეყნიდან და 14 აკადემიურ პროგრამას მოიცავს.

ალტე უნივერსიტეტი აქტიური წევრია ისეთი საერთაშორისო აკადემიური ქსელების, როგორებიცაა:

• European University Association (EUA)
• Global University Network For Innovation (GUNi)
• Association for Computing Machinery (ACM)
• Society in Europe for Simulation Applied to Medicine (SESAM)
• The Coalition for Advancing Research Assessment (CoARA) და სხვა.

50-ზე მეტი პარტნიორი საერთაშორისო უნივერსიტეტის დახმარებით, ალტე უნივერსიტეტი ხელს უწყობს სტუდენტებისა და აკადემიური პერსონალის მობილობას, საერთაშორისო კონფერენციებში, კვლევით პროექტებსა და გაცვლით პროგრამებში მონაწილეობას.