ბითლზის ლეგენდამ, სერ პოლ მაკარტნიმ კაფე "მზიურს" თანადგომა გამოუცხადა. 2017 წლიდან კაფე "მზიური" მისი ინიციატივის, “უხორცო ორშაბათის” მხარდამჭერია, რომელიც ცხოველებისა და გარემოს დაცვის პრობლემას ეხმიანება.

"მე სრულად ვუჭერ მხარს ანას ძალისხმევას კაფესთან დაკავშირებით და დიდი იმედი მაქვს, რომ მას კვლავაც მიეცემა "უხორცო ორშაბათის" კარგად განხორციელების საშუალება" — ნათქვამია პოლ მაკარტნის წერილში.

ფოტო: კაფე "მზიური"

ცნობისთვის, 15 ივნისს კაფე "მზიურმა" მერიისგან ხელშეკრულების შეწყვეტასთან დაკავშირებით მიიღო წერილი. თბილისის მერიის გადაწყვეტილებით, კაფეს შენობა აუქციონზე გავა და "მზიურის" კაფე „ადგილობრივ ბიუჯეტში თანხების მობილიზების საშუალებად“ იქცევა.

კაფე "მზიური" სამოქალაქო საწარმოა, რომელიც მუდმივად ზრუნავს ადამიანთა და ცხოველთა უფლებების დაცვაზე. სამოქალაქო საზოგადოება კაფეს მხარდაჭერას უცხადებს და მზადყოფნას გამოთქვამს მისი გადარჩენისთვის საჭირო აქტივობებში მონაწილეობაზე.