19 ივლისს, კასე კიკმა, რომელიც ამჟამად ამერიკის შეერთებულ შტატებში ცხოვრობს, განაცხადა, რომ პოლიციამ ყარაჩაი-ჩერქეზეთში, მისი მშობლების სახლში ჩხრეკა ჩაატარა და მათ ტელეფონები ჩამოართვა, რაც, აქტივისტის თქმით, "არალეგალური და არასანქცირებულია".

კიკმა თქვა, რომ ჩხრეკა FSB-მ და ადგილობრივმა შინაგან საქმეთა სამინისტროს ექსტრემიზმის წინააღმდეგ ბრძოლის ცენტრმა ჩაატარეს.

"მიუხედავად იმისა, რომ ადრე, ომამდე, FSB-ის ოფიცრები ჯერ კიდევ ფორმალურად აკვირდებოდნენ საპროცესო კანონმდებლობის დაცვას, ახლა მათ უარი თქვეს ყველა ფორმალობაზე და იქცევიან, როგორც ფორმიანი ბანდიტები", — განუცხადა მან OC Media-ს.

კიკმა დასძინა, რომ მის მშობლებს არ წარუდგინეს ოფიციალური დოკუმენტები ჩხრეკის, ან ნივთების ჩამორთმევის შესახებ.

"განხორციელდა ძლიერი ფსიქოლოგიური ზეწოლა, რასაც, წამების გარდა, სხვას ვერაფერს ვუწოდებთ“, — თქვა კიკმა.

მან აღნიშნა, რომ რეიდს განიხილავს, როგორც დაშინების ფორმას, სხვა აქტივისტების, ან ადამიანების მიმართ, რომლებიც გულშემატკივრობენ მის საქმიანობას.

კიკი არის ჩერქეზული კონგრესის დამფუძნებელი და გაერთიანებული ჩერქეზეთის საბჭოს წევრი. საბჭო დაარსდა იმ მიზნით, რომ ემუშავა "დამოუკიდებელი სახელმწიფო სტრუქტურის შექმნის მიზნისთვის".

საბჭომ, ასევე, ცოტა ხნის წინ მიმართა რამდენიმე ქვეყანას, ეღიარებინათ რუსეთის იმპერიის მიერ მე-19 საუკუნეში ჩადენილი გენოციდი და ჩრდილოეთ კავკასიიდან ჩერქეზების მასობრივი დეპორტაცია.

"ნათესავებისა და ახლობლების ფსიქოლოგიური წამების გზით ხდება ზეწოლა და შანტაჟი ჩემზე და [სხვა] აქტივისტებზე. მე არ ვარ პირველი და არც უკანასკნელი ვიქნები ამ მხრივ. ჩვენ უამრავი ასეთი მაგალითი გვაქვს", — განუცხადა მან OC Media-ს.

კიკი ადრე დააკავეს წვრილმანი ხულიგნობის ბრალდებით ჩერკესკში, 2022 წლის მაისში, მან კარაოკე ბარში უკრაინული სიმღერა მოითხოვა.

ის ამტკიცებს, რომ ხელისუფლებამ აწამა და სცემა, რათა ეღიარებინა, რომ კავშირები ჰქონდა უკრაინასთან, თურქეთთან, აშშ-სთან და რუსეთში ოპოზიციურ მოძრაობებთან.

აპრილში ჩერქეზთა კონგრესი შეუერთდა სხვა ჩერქეზული ორგანიზაციების მიმართვას, რომელიც მოუწოდებდა ჩერქეზებს, არ შეერთებოდნენ რუსეთის შეჭრას უკრაინაში.

2023 წელს ყარაჩაი-ჩერქეზეთის შინაგან საქმეთა სამინისტრომ კიკი დაადანაშაულა რუსული არმიის დისკრედიტაციაში და მოითხოვა მისი პასუხისგებაში მიცემა. საქმე ჩერკესკის საქალაქო სასამართლომ არ დააკმაყოფილა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.