ადამიანის უფლებათა ევროპულმა სასამართლომ საქმეზე "მამულაშვილი საქართველოს წინააღმდეგ" დაადგინა, რომ ზაზა მამულაშვილი, წინა ხელისუფლების დროს, იყო წამებისა და არაადამიანური მოპყრობის მსხვერპლი პენიტენციურ დაწესებულებაში, რაზეც სახელმწიფომ არ აწარმოვა ეფექტიანი გამოძიება.

ინფორმაციას საქართველოს ახალგაზრდა იურისტთა ასოციაცია (საია) ავრცელებს, რომელიც ამ საქმეს USAID-ის სამართლის უზენაესობის პროგრამის მხარდაჭერით ახორციელებდა.

საია-ს ცნობით, ადამიანის უფლებათა ევროპულმა სასამართლომ კონვენციის მე-3 მუხლის (წამების აკრძალვა) როგორც მატერიალური, ისე პროცედურული დარღვევა დაადგინა, რაც გულისხმობს, იმას რომ სახელმწიფოს მხრიდან 2012 წელს ზაზა მამულაშვილი დაექვემდებარა არასათანადო მოპყრობას, ხოლო 2012 წლის შემდგომ მის მიმართ ჩადენილი დანაშაულები არ არის სათანადოდ შესწავლილი და გამოძიებული.

არასამთავრობო ორგანიზაციის ინფორმაციით, ზაზა მამულაშვილის საქმეს ეროვნულ სასამართლოებში სხვადასხვა ინსტანციაში მოსამართლეები: ნათია ჯორბენაძე, მერაბ ლომიძე, თეა ძიმისტარაშვილი, გიორგი ტყავაძე, ვასილ როინიშვილი, მაია ვაჩაძე და ნუგზარ სხირტლაძე განხილავდნენ.

"ეროვნულ დონეზე საქმის განმხილველმა მოსამართლეებმა ვერ დაინახეს მიყენებული დაზიანებების კავშირი პატიმრობაში ყოფნის პერიოდთან, მაშინ როდესაც მომჩივანს პენიტენციურ დაწესებულებაში მოთავსებამდე ჯანმრთელობის დაზიანებები არ აღენიშნებოდა. აღსანიშნავია, რომ ხსენებულთაგან ნათია ჯორბენაძის გარდა, ყველა პირი, დღეის მდგომარეობით, კვლავ განაგრძობს სამოსამართლო საქმიანობას", — ნათქვამია საია-ს განცხადებაში.