უცნობია როდის გამოიკვლევს სახელმწიფო მოქალაქეების სისხლში ტყვიის მოცულობას. სისხლში ტყვიის მოცულობის გამოკვლევის საკითხი მას შემდეგ გახდა აქტუალური, რაც ქართულ სუნელებში ტყვიის მაღალი მაჩვენებლის შესახებ ნიუ-იორკის ჯანდაცვის დეპარტამენტმა მოსახლეობა გააფრთხილა. ქართული სუნელების ნაწილში ტყვიის არსებობა დაადასტურა სურსათის ეროვნული სააგენტოს მიერ ჩატარებულმა კვლევებმაც.

დაავადებათა კონტროლის ეროვნული ცენტრის გარემოს ჯანმრთელობის სამმართველოს უფროსმა, ნანა გაბრიაძემ On.ge-ს განუცხადა, რომ ამ ეტაპზე კვლევის დიზაინის შემუშავება მიმდინარეობს, რომლითაც გადაწყდება როგორ მოიცავენ საქართველოს ტერიტორიას. მისი თქმით, კვლევით განისაზღვრება რა მასშტაბის პრობლემაა საქართველოში, რის შემდეგაც დაისახება ღონისძიებები, როგორ შეიძლება გაგრძელდეს ამ საკითხზე მუშაობა.

"ჯერ არ ვიცით როდის ჩატარდება კვლევა. ამის შესახებ ინფორმაციას მოგაწოდებთ და გადაწყვეტილება მიიღებს ბატონი ამირანი [ცენტრის დირექტორი]", - განუცხადა დაავადებათა კონტროლის ეროვნული ცენტრის გარემოს ჯანმრთელობის სამმართველოს უფროსმა On.ge-ს.

ის დასძენს, რომ სავარაუდოდ კვლევა ხუთ წლამდე ბავშვებში ჩატარდება, ხოლო კვლევა გამოკითხვის ხასიათის იქნება თუ სისხლის ჩაბარებით გამოიკვლევენ ორგანიზმში ტყვიის მოცულობას კვლევის დიზაინის შემუშავების შემდეგ გახდება ცნობილი.