სოციოლოგის, იაგო კაჭკაჭიშვილის თქმით, კვლევა პროდასავლური ოპოზიციური პარტიების შესაძლო კონფიგურაციის შესახებ, სამოქალაქო საზოგადოების ფონდის ფინანსური მხარდაჭერით, სოციალური კვლევისა და ანალიზის ინსტიტუტის (ISSA) მიერ მომზადდა:

"კვლევა მიზნად ისახავდა წინასაარჩევნო პროცესში საზოგადოებრივი განწყობების შესახებ ინფორმაციის მოგროვებას, ანალიზს, და გადაწყვეტილების მიღების პროცესში დაინტერესებული მხარეებისთვის სანდო ინფორმაციის მიწოდებას".

კაჭკაჭიშვილის თქმით, კვლევის მეთოდოლოგია იყო ასეთი:

  • კვლევის ტიპი: რაოდენობრივი კვლევა;
  • სამიზნე ჯგუფი: საქართველოს სრულწლოვანი (18+) მოსახლეობა;
  • შერჩევით ერთობლიობა: 2000 რესპონდენტი;
  • მეთოდი: პირისპირ ინტერვიუ;
  • შერჩევის ცდომილება: ±2.2% მთლიანი შერჩევისთვის, 95%-იანი სანდოობით.

სოციოლოგი წერს, რომ კვლევის ძირითადი მიგნებების მიხედვით, საქართველოში არსებული ხელისუფლების ცვლილებას მხარს უჭერს საქართველოს მოსახლეობის უმრავლესობა, საქართველოში პროდასავლური ოპოზიციური პარტიების მხარდამჭერთა ჯამი არსებითად აღემატება ქართული ოცნების მხარდამჭერთა რაოდენობას.

გარდა ამისა, პროდასავლური ოპოზიციური პარტიების სხვადასხვა კომბინაციით გაერთიანების გარეშე იკარგება პროდასავლური ამომრჩევლის ხმების ის რაოდენობა, რომელიც ქართულ ოცნებას საშუალებას მისცემს გაიმარჯვოს არჩევნებში: "შესაბამისად, იმ პროდასავლური ოპოზიციური პარტიების არჩევნებში დამოუკიდებლად მონაწილეობა, რომლებიც ვერ ლახავენ ბარიერს, მხოლოდ ქართულ ოცნებას დაეხმარება".

ასევე, კვლევის შედეგების მიხედვით, პროდასავლური ოპოზიციური ამომრჩევლის სრული უმრავლესობა მხარს უჭერს პროდასავლური ოპოზიციური პარტიების ამა თუ იმ ფორმით გაერთიანებას, რათა არ დაიკარგოს პროდასავლური ხმები.

"ვფიქრობდით და ვფიქრობთ, რომ კვლევის შედეგები გამოყენებული უნდა იქნას დაინტერესებული მხარეების მიერ გადაწყვეტილების მიღების პროცესში და არა საარჩევნო კამპანიის წარმოებისას არგუმენტად", — წერს კაჭკაჭიშვილი.

ამ თემაზე: საუკეთესო შედეგი ოპოზიციისათვის სამი ცენტრის ჯამს მოაქვს — ევროპული საქართველო კვლევას ასაჯაროებს