ევროპული საქართველო ასაჯაროებს კვლევის შედეგებს, რომლის მიხედვით ირკვევა, რომ საუკეთესო შედეგი ოპოზიციისთვის მოაქვს სამ ბლოკად გადანაწილებას, ვიდრე საერთო სიას.

კვლევა, მათი ინფორმაციით, არასამთავრობო ორგანიზაციების და რამდენიმე ოპოზიციური პარტიის მიერ ჩატარდა, თუმცა მონაწილეობა არ მიუღია ევროპულ საქართველოს.

ამ კვლევის მიხედვით, როგორც პარტიის განცხადებაში წერია, გაზრდილია ევროპული საქართველოს მხარდაჭერა, საუკეთესო სინერგია კი აქვს ევროპული საქართველოს, ახალის და ლელოს საარჩევნო ერთეულად ქცევას — 2.5 %-ით მეტი, ვიდრე ამ პარტიების რეიტინგის მექანიკური ჯამია.

ოპოზიციური და გადაუწყვეტელი ამომრჩევლის 60 პროცენტზე მეტი არ უჭერს მხარს ოპოზიციის ერთიანი სიით გასვლას არჩევნებზე.

"იმ ტიპის სიმძიმის ცენტრის შექმნა პროდასავლურ ოპოზიციაში, რომელიც ცალსახად მთავარ ოპოზიციურ სუბიექტად იქნება წარმოჩენილი, რომელიც მკაფიოდ გაემიჯნება კეზერაშვილის და სააკაშვილის ალიანსს, საუკეთესო გზაა ივანიშვილის რეჟიმის დასამარცხებლად.

ჩვენ ამ კვლევის შედეგების გაცნობამდე და ამის შემდეგაც მივმართეთ საჯაროდ და არასაჯაროდაც, ამ პოლიტიკური პარტიების ხელმძღვანელებს, თუმცა, საწყისი კომუნიკაციის შემდეგ, მათგან მხოლოდ დუმილია. ვისმენთ მხოლოდ სატელევიზიო ზოგად განცხადებებს და პროცესი, რეალური მოლაპარაკებებისა, სადაც ბევრი რამეა სწრაფად გასარკვევი, რათა ამომრჩეველმა ნათლად დაინახოს სურათი, არსად არ მიდის და ფაქტობრივად ჩიხში არის შეყვანილი.

ჩვენ არ ვიცით, რა არის ამის მიზეზი, თუმცა, ფაქტია, რომ ერთ-ერთი მთავარი კრიტერიუმი ჩვენთვის ამ გაერთიანებისათვის იყო და არის მკაფიო დისტანცირება, გამიჯვნა და დაგმობა იმისა, რასაც ვხედავთ სააკაშვილ-კეზერაშვილის ალიანსში, ვგულისხმობთ ბელადომანიას, კერპთაყვანისმცემლობას, და ჩრდილოვანი ოლიგარქიული მართვის მცდელობას - ანუ ყველაფერ იმას რითაც ივანიშვილის რეჟიმს დაემსგავსა დღევანდელი ნაციონალური მოძრაობა. თუ ეს მიდგომა მიუღებელია იმ პოლიტიკური პარტიებისათვის რომლებსაც ჩვენ მივმართეთ, ეს საჯაროდ ცნობილი უნდა იყოს საზოგადოებისათვის.

ჩვენ უპასუხისმგებლობად მიგვაჩნია მათი მხრიდან მხოლოდ სატელევიზიო განცხადებები ბლოკების გაკეთების თაობაზე მაშინ, როდესაც რეალურად მოლაპარაკებები ევროპულ საქართველოსთან არ მიმდინარეობს", — წერია პარტიის განცხადებაში.