სომხეთის უშიშროების საბჭოს ხელმძღვანელმა განაცხადა, რომ ერევანი და ვაშინგტონი "არსებით“ მოლაპარაკებებს აწარმოებენ სომხეთში ახალი ატომური ელექტროსადგურის ასაშენებლად.

ოთხშაბათს, უშიშროების საბჭოს მდივანმა არმენ გრიგორიანმა თქვა, რომ ორი ქვეყანა ახლა ელექტროსადგურის მშენებლობის სამართლებრივ ჩარჩოს განიხილავს.

"საკანონმდებლო ბაზის გარეშე, წინ ვერ წავალთ. ამ მომენტში შემიძლია ვთქვა, რომ ბურთი აშშ-ის მოედანზეა“, — თქვა მან და დასძინა, რომ ელექტროსადგურზე მუშაობა დაიწყება მას შემდეგ, რაც აშშ განახორციელებს თავის "შიდა პროცესებს“, თუმცა დამატებით დეტალებზე არ უსაუბრია.

პრემიერ-მინისტრმა ნიკოლ ფაშინიანმა 2021 წლის ოქტომბერში განაცხადა, რომ ერევანი აწარმოებს მოლაპარაკებებს რუსეთთან ახალი ობიექტის აშენებაზე, რომელიც ჩაანაცვლებს მოძველებულ მეწამორის ატომურ ელექტროსადგურს, ეს არის ერთადერთი ატომური ელექტროსადგური კავკასიაში.

2023 წლის დეკემბერში სომხეთმა კონტრაქტი გააფორმა რუსეთის სახელმწიფო ატომურ სააგენტოსთან, როსატომთან, მეწამორის მუშაობის 2036 წლამდე გახანგრძლივებაზე, მოლაპარაკებები მიმდინარეობს მოძველებულ ობიექტზე ახალი რეაქტორის აშენებაზე.

თუმცა, რამდენიმე თვის შემდეგ, სომხეთ-აშშ-ევროკავშირის სამიტის ერთობლივ განცხადებაში ეწერა, რომ ვაშინგტონი აპირებდა დახმარებოდა სომხეთს ენერგეტიკული წარმოებისა და წყაროების დივერსიფიკაციაში და "სამოქალაქო ბირთვული ენერგიის ახალი შესაძლებლობების მიზანშეწონილობის შესწავლაში".

შეერთებულმა შტატებმა და სომხეთმა მანამდე, 2022 წელს, ხელი მოაწერეს ურთიერთგაგების მემორანდუმს, სამოქალაქო ბირთვული თანამშრომლობის შესახებ, სტრატეგიული თანამშრომლობის გაღრმავების მიზნით.

რუსეთთან ურთიერთობების გაუარესების მიუხედავად, სომხეთის ტერიტორიული ადმინისტრაციისა და ინფრასტრუქტურის სამინისტრომ რადიო თავისუფლებას რამდენიმე თვის წინ განუცხადა, რომ ისინი აწარმოებენ მოლაპარაკებებს აშშ-სთან, რუსეთთან და სამხრეთ კორეასთან, ახალი ელექტროსადგურის მშენებლობასთან დაკავშირებით.

მეწამორი, რომლის ამჟამინდელი ერთადერთი მოქმედი რეაქტორი ჩაირთო 1980 წელს, 2021 წელს სომხეთის ელექტროენერგიის 26%-ს აწარმოებდა.

გარემოსდაცვითი კამპანიის მონაწილეებმა, თურქეთმა და ევროკავშირმა გამოთქვეს შეშფოთება უსაფრთხოებასთან დაკავშირებით და მოუწოდეს მთავრობას მისი დახურვისკენ.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.