სომხეთის პრემიერ-მინისტრმა ნიკოლ ფაშინიანმა დაადასტურა, რომ სომხეთი აპირებს დატოვოს რუსეთის ხელმძღვანელობით მოქმედი კოლექტიური უსაფრთხოების ხელშეკრულების ორგანიზაცია (CSTO).

ოთხშაბათს პარლამენტში გამართულ სესიაზე, კითხვა-პასუხის რეჟიმისას ფაშინიანმა თქვა, რომ სომხეთს ჯერ არ აქვს გადაწყვეტილი, როდის დატოვებს ორგანიზაციას, თუმცა "სხვა გზა აღარ არის".

მანამდე ფაშინიანმა კვლავ დაადანაშაულა CSTO-ს წევრები აზერბაიჯანის დახმარებაში, მთიან ყარაბაღსა და სომხეთზე თავდასხმებისას.

თადევოს ავეტისიანმა, ოპოზიციური სომხეთის ალიანსის დეპუტატმა პრემიერ-მინისტრს კითხა, თუ ფიქრობს მთავრობა იმაზე, როგორი იქნებოდა სომხეთი და მთიანი ყარაბაღი, თუ ხელისუფლებაში ისინი არ იქნებოდნენ. ფაშინიანმა უპასუხა, რომ სწორედ ამ კითხვაზე პასუხის მიხედვით მოქმედებენ.

მისი თქმით, მან ოპოზიციას უთხრა, რომ სომხური სახელმწიფოებრიობის არსებობა საფრთხეშია. კითხვაზე, თუ ვინ იყო დამნაშავე, ფაშინიანმა ბრალი დასდო თავის წინამორბედს, სერჟ სარგსიანის მთავრობას, იმის გამო, რომ საყრდენად რუსეთი და CSTO აარჩია.

"დამნაშავეები არიან ისინი, ვინც შექმნა ერთგვარი "კავშირი ბუშტი", რომლის წევრებიც, სახელშეკრულებო ვალდებულებების შესრულების ნაცვლად, წავიდნენ და დაგეგმეს ომი აზერბაიჯანთან ჩვენ წინააღმდეგ“, — განაცხადა მან.

"მაშინ, დატოვეთ CSTO!", — უთხრა ოპოზიციონერმა დეპუტატმა ფაშინიანს, რაზეც პრემიერმა თქვა, რომ ორგანიზაციას მართლაც დატოვებენ.

"ჩვენ თავად გადავწყვეტთ, როდის გავალთ. როგორ ფიქრობთ, რა იქნება შემდეგი ნაბიჯი, ჩვენ შევძლებთ დაბრუნებას? სხვა გზა არ არის", — თქვა მან.

"ნება მომეცით გითხრათ, სად მივდივართ და ვიტყვი კიდეც, რომ თითქმის მივედით. ჩვენ მივდივართ ნამდვილ სომხეთში, სუვერენულ, უსაფრთხო, მშვიდობიან, დემარკირებულ საზღვრების მქონე სახელმწიფოში. არ იღელვოთ, ჩვენ უკან არ დავბრუნდებით", — განაცხადა ფაშინიანმა.

თუმცა, მოგვიანებით, საგარეო საქმეთა მინისტრმა არარატ მირზოიანმა თქვა, რომ ფაშინიანს არ უთქვამს, რომ სომხეთი CSTO-ს დატოვებს.

"სომხეთის პრემიერ-მინისტრს არ უთქვამს, რომ ჩვენ ვტოვებთ CSTO-ს. მან თქვა, რომ ჩვენ გადავწყვეტთ, როდის წავალთ", — განაცხადა მირზოიანმა.

სომხეთის ურთიერთობები რუსეთთან და CSTO-სთან 2020 წლის მეორე მთიანი ყარაბაღის ომის შემდეგ გაუარესდა.

მას შემდეგ, რაც ტრადიციულმა პარტნიორებმა ვერ შეძლეს დახმარებოდნენ სომხეთს 2021 და 2022 წელს აზერბაიჯანის შეჭრისას, სომხეთში მათ მიმართ იმედგაცრუებამ მოიმატა.

აზერბაიჯანი არ არის CSTO-ს წევრი. ორგანიზაციაში შემავალი ქვეყნები ვალდებულები არიან, ჩაერიონ პროცესებში, თუ რომელიმე წევრს სხვა ქვეყანა თავს დაესხმება.

2022 წლის მოვლენების შემდეგ, ორგანიზაციამ სომხეთს შესთავაზა "ფაქტების დამდგენი მისიის“ გაგზავნა და უარი თქვა აზერბაიჯანის დადანაშაულებაზეც კი. ამის პარალელურად კი დასავლეთის რამდენიმე ქვეყანამ მოუწოდა აზერბაიჯანს, ჯარები გაეყვანა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.