ჩვენ უკვე ვისწავლეთ აკვარიუმის ყველაზე გავრცელებული თევზების მოვლის მარტივი წესები და ასევე ყველაფერი ვიცით იმ მითებზე, რაც აკვარიუმისა და მისი ბინადრების შესახებ არსებობს.

თუ თევზების მოვლა ისევ გიტაცებთ და მობეზრების ნაცვლად ამ არსებების მიმართ ინტერესი კიდევ უფრო მეტად გაგიღვივდათ, თქვენი ოცნების აკვარიუმამდე, ჯერ კიდევ ბევრი რამ გაქვთ სასწავლი, რადგან აკვარიუმი მხოლოდ ოთახის დეკორაცია არ არის. ის ერთი მთლიანი ცოცხალი ორგანიზმია, რომელიც სხვადასხვა ნაწილებისაგან შედგება. წყლის მცენარეები, ლოკოკინები, თევზები თუ სხვა და თითოეულ მათგანს ისეთივე მოვლა სჭირდება როგორც ნებისმიერ სხვა შინაურ ცხოველს.

გარდა წყალში ლამაზად მოლივლივე თევზების ყურებისა, დამწყებ აკვარიუმისტებს სხვა უფრო საინტერესო მიზნები და სურვილები შეიძლება ჰქონდეთ. მაგალითად, წყალმცენარეებისგან ხელოვნური ბაღის მოწყობა, თევზის იშვიათი სახეობების შეგროვება და რაც ყველაზე მთავარია მათი გამრავლება. მთელ ამ პროცესში კი მაქსიმალური მონაწილეობის მიღება თუ დაკვირვება, უდიდესი სიამოვნების წყარო შეიძლება გახდეს.

ახლა კი კონკრეტულად აკვარიუმის თევზების გამრავლებაზე ვისაუბროთ და გავიგოთ თუ როგორ მრავლდება თევზი გუპი. რატომ ეს სახეობა? რადგან ის მტკნარი წყლის ცოცხლადმშობი თევზია და სხვა თევზებისაგან განსხვავებით ბევრად უფრო მარტივი გასამრავლებელია.

მდედრი და მამრი გუპი

ფოტო: AQUARiUM

მდედრისა და მამრ ინდივიდის შორის ბევრი სხვაობა არის, მამრების შედარებით მომცრო ზომის ტანი, 1,5 - 4 სმ.-მდე მერყეობს და უფრო მკვეთრი და მრავალფეროვანი შეფერილობით გამოირჩევა. მდედრი გუპები კი ზომით გაცილებით დიდები 2,8 - 7 სმ. არიან და მათი კუდი ნაკლებად მომხიბვლელია. აქედან გამომდინარე, შეიძლება ითქვას, რომ მდედრი და მამრი გუპები ერთმანეთისგან ზომითა და შეფერილობით განსხვავდებიან, რაც დამწყები და შესაბამისად გამოუცდელი აკვარიუმისტებისთვისაც კი მარტივად შესამჩნევი იქნება.

როგორ გავამრავლოთ გუპი?

ფოტო: Aquarium Tidings

როგორც უკვე გითხარით, გუპები თევზების იმ კატეგორიას მიეკუთვნებიან, რომლებიც ქვირითის დაყრის მაგივრად, ლიფსიტებს ცოცხლად შობენ. ყველაზე სახალისო კი ის არის, რომ ახალდაბადებული პატარა გუპები მაშინვე იწყებენ ცურვასა და გემრიელი საკვების აქტიურ ძებნას.

სანამ აქამდე მიხვალთ და სახლში ნამდვილ სამშობიაროს მოიწყობთ, სადაც ათობით პატარა გამოსაკვები და მოსავლელი გეყოლებათ, უნდა გაითვალისწინოთ რამდენიმე მნიშვნელოვანი წესი:

აკვარიუმში ერთ მამრ ინდივიდზე შეგიძლიათ ორი ან სამი მდედრი გუპი იყოლიოთ. თითოეული მათგანი მალევე შეჯვარდება მამრთან, რაც მათ გამრავლებას გარანტირებულს გახდის.

როდესაც შეამჩნევთ, რომ მდედრის მუცელს სამკუთხედი ფორმა აქვს და მუქი შავი ფერი დაჰკრავს, სასწრაფოდ გადასვით წინასწარ მომზადებულ ქილაში, რათა თავიდან აიცილოთ ახალშობილ ლიფსიტებზე, სხვა ზრდასრული თევზების ნადირობა.

მშობიარობის შემდეგ დედა ამოსვით, ლიფსიტები კი სამი კვირის მანძილზე ქილაში დატოვეთ. სწორი კვებისა და მოვლის შემთხვევაში ისინი მალე გაიზრდებიან და მხოლოდ ამის შემდეგ შეძლებთ მათი საერთო აკვარიუმში გადაყვანას, დანარჩენ ოჯახის წევრებთან ერთად.

აკვარიუმისა და მისი ბინადრების შესახებ ასევე შეგიძლიათ წაიკითხოთ: