როგორ ვაკონტროლოთ წყალმცენარეების ზრდა აკვარიუმში

ალგე წყალმცენარეა, რომელიც ბევრი აკვარიუმის მოუგვარებელ პრობლემას წარმოადგენს. ამ მოსაბეზრებელი წყალმცენარის გაჩენისა და გამრავლების მიზეზი მრავალგვარია, შესაბამისად მისი ზრდის კონტროლი ინდივიდუალურად ხდება.

არ გამოკვებოთ თევზები ხშირად

როგორც წესი, ზრდასრულ თევზებს დღეში ერთხელ ან ორჯერ კვებავენ, გააჩნია სახეობას. თევზებისათვის ხშირად და ბევრი საკვების მიცემა მის ჯანმრთელობას აზიანებს და აკვარიუმში სისუფთავის დაცვასაც ართულებს. თუ თევზს ბევრ საჭმელს არ მიაწვდით, ის მიკროორგანიზმებზე დაიწყებს ნადირობას. ასეთ შემთხვევაში კი საფრთხე, რომ თქვენს აკვარიუმში დაუპატიჟებელი და აბეზარი წყალმცენარეები გაჩნდნენ, მინიმუმამდე დავა.

აკონტროლეთ აკვარიუმის განათება

თუ თქვენი აკვარიუმი დილიდან დაღამებამდე განათებულია, ამით თქვენდაუნებურად ალგეს გამრავლებას უწყობთ ხელს. ეცადეთ, რომ განათება აკვარიუმში მხოლოდ რამდენიმე საათით ჩართოთ ხოლმე.

აკვარიუმის გაწმენდა მნიშვნელოვანია

აუცილებელია, რომ აკვარიუმში კვირაში ერთხელ მაინც განაახლოთ წყლის 1/3, გულდასმით გაწმინდოთ აკვარიუმის კედლები და გაწმინდოთ ფსკერიც. აკვარიუმში სისუფთავის დაცვა სპეციალური მაგნიტიანი საწმენდით ძალიან მარტივია, თან არც დიდ დროს წაგართმევთ.

იყოლიეთ აკვარიუმის დამლაგებელი თევზები

აკვარიუმში სისუფთავეზე მხოლოდ თქვენ რომ არ იყოთ პასუხისმგებელი, იყოლიეთ ე.წ დამლაგებელი თევზები, რომლებიც ამ საქმეში სიამოვნებით დაგეხმარებიან, ისინი 24 საათის განმავლობაში მზად არიან, გაანადგურონ ნებისმიერი პარაზიტი, წყალმცენარეების წამონაზარდები თუ საკვების ნარჩენები.

ნერიტინა იგივე Neritina natalensis ლამაზზოლებიანი ლოკოკინაა, რომელსაც არ უყვარს სიმწვანე აკვარიუმში და მისი დაუძინებელი მტერია, რაც ამ შემთხვევაში სულაც არაა ცუდი.

Crossocheilus oblongus ანუ სიამის ხავსიჭამია ეფექტურად ებრძვის ნებისმიერი ტიპის ალგეს.

ანცისტრუსი ერთ-ერთი ყველაზე პოპულარული თევზია აკვარიუმისტებისათვის. მისი მთავარი ფუნქცია აკვარიუმის კედლების გაპრიალება და დასუფთავებაა.

როგორც ხედავთ, თუ თქვენს აკვარიუმს ალგე გაუჩნდა, ხელის ჩაქნევა არ ღირს. მასთან ბრძოლა მარტივად შეიძლება.

აკვარიუმებისა და თევზების მოვლაზე კი შეგიძლიათ წაიკითხოთ ჩემი აკვარიუმის პირველი, მეორე და მესამე ნაწილები.

ბოლო ამბები:

გირჩევთ