ბავშვობაში იმ კატეგორიას მივეკუთვნებოდი, ყველა ცხოველი რომ სახლში მოჰყავთ. ნაწილობრივ ახლაც ასე ვარ. შეიცვალა მხოლოდ ის, რომ ასაკის მატებასთან ერთად მეტი სიფრთხილით ვეკიდები ამ ამბავს და ვცდილობ პასუხისმგებლობის აღებისას ჩემი შესაძლებლობებიც გავითვალისწინო. ბოლოს და ბოლოს, ოჯახში ახალი წევრის (იქნება ოთხფეხა თუ ფარფლებიანი) შემოყვანა დიდი გამოწვევაა.

პირველად სრულიად არაინფორმირებულმა და მოუმზადებელმა მოვინდომე სახლში თევზების ყოლა. ერთადერთი, რაც ზუსტად ვიცოდი, იყო ის, რომ აკვარიუმი იქნებოდა ძალიან პატარა და თევზები - მომცრო ზომის, მეგონა, ასე საქმეს გავიიოლებდი და მათი მოვლის ყოველდღიურ სავალდებულო რუტინას გავიმარტივებდი.
ზაფხულის ერთ ცხელ დღეს მოსულმა უწყინარმა იდეამ, რომ პატარა აკვარიუმითა და რამდენიმე თევზით ჩემი ოთახი გამელამაზებინა, თითქმის მთელი ჩემი დღის წესრიგი შეცვალა. როგორც აღმოჩნდა, ამ ერთი შეხედვით მარტივად მოსავლელ ბინადრებს დიდი ყურადღება სჭირდებათ.

ჩემი პირველი თევზი - ცისფერი ნეონი (Neon tetra)

ცისფერი ნეონი ერთი ციცქნა, ლამაზი, ნახევრად გამჭვირვალე არსებაა, თუმცა მისი მოვლის სირთულე ხანდახან ამ სილამაზეს გავიწყებს. ორი ასეთი თევზითა და 5-ლიტრიანი აკვარიუმით სახლში დაბრუნებულმა, მოგვიანებით აღმოვაჩინე, რომ მხოლოდ წყალი და აკვარიუმი არ იყო საკმარისი. ნეონებისთვის აუცილებელია სპეციალური გამათბობელი, ფილტრი და ჟანგბადით გაჯერებული წყალი. ინტერნეტში ძრომიალისას კი გავარკვიე, რომ პატარა აკვარიუმში თევზის გაშვება დანაშაულის ტოლფასია, მით უმეტეს, თუ სხვა პირობებს არ შეუქმნი კომფორტული ცხოვრებისათვის. რა თქმა უნდა, ამის გამო არ დაისჯებით, თუმცა თქვენი თევზი მალევე გამოემშვიდობება სიცოცხლეს. გარდა იმისა, რომ პატარა აკვარიუმი ძალიან სწრაფად და მარტივად ბინძურდება, ტემპერატურაც ცვალებადია, რასაც წყლის მცირე მოცულობა განაპირობებს. პატარა სივრცეში თევზები მუდმივ სტრესში ცხოვრობენ და მალევე იღუპებიან. პატარა აკვარიუმში თევზებისთვის საჭირო აღჭურვილობის მიმაგრებაც საკმაოდ რთულია. იზღუდები თევზების სახეობაში, რაოდენობაში და ზომებში.

ნეონების მოვლა-პატრონობის პროცესში გამოცდილებასაც ვიძენდი და პერიოდულად ვყიდულობდი სხვა სახეობის აკვარიუმის თევზებს.

გუპი, პეცილია, სკალიარი, ბარბუსი, დანიო და ბეტა

ეს იმ თევზების ჩამონათვალია რომლებსაც ჰარმონიულად და მეგობრულად შეუძლიათ თანაცხოვრება. მათ ყიდვასთან ერთად გავზარდე აკვარიუმის ზომა. მოვლის მეთოდებში შეიძლება იყოს მცირე სხვაობა ტემპერატურის, წყლის სიხისტის, საკვებისა და აუცილებელი წყალმცენარეების მიხედვით, თუმცა თუ აკვარიუმის მოწყობისას თითოეული მათგანისთვის აუცილებელ და ჯამში ოპტიმალურ გარემოს შექმნით, პრობლემა არ წარმოიშვება. თუმცა, უნდა გაითვალისწინოთ თევზების ზრდასრულობისა და მომწიფების ასაკი სქესობრივი კავშირისათვის. თუ 3 თვის გუპი (Guppy) ზრდას წყვეტს და მალევე ცოცხლად შობს ლიფსიტებს, არსებობენ თევზები, რომლებიც 1 წლის ასაკში იწყებენ გამრავლებას და დებენ ქვირითს.

გუპი ერთ-ერთი ყველაზე პოპულარული თევზია დამწყებ აკვარიუმისტებში, ძირითადად იმიტომ რომ მისი მოვლა საკმაოდ მარტივია (ამავე ნიშნითაა პოპულარულია ბეტაც (Betta). თუმცა ამ სახეობის მამრი თევზი ტერიტორიების მოყვარული და მესაკუთრეა, ასე რომ სანამ აკვარიუმში გაუშვებდეთ, გაითვალისწინეთ რომ ორი მამრი ერთმანეთს სამკვდრო-სასიცოცხლო ომს გამოუცხადებს აკვარიუმის არცთუ დიდი ტერიტორიების მოსაპოვებლად. ამიტომ სასურველია გყავდეთ მხოლოდ ერთი მამრი ბეტა. თუმცა მოსაზრება, რომ ეს თევზი ჭიქა წყალშიც ბედნიერად გრძნობს თავს, არ შეესაბამება სიმართლეს. მას ძალიან უყვარს ცურვა, შესაბამისად მუდმივ მოძრაობაშია, რისი საშუალებაც მას აუცილებლად უნდა ჰქონდეს.

შეიძლება ითქვას, რომ შინაურ ცხოველებზე, მათ მოვლა-პატრონობაზე და კონკრეტულად აკვარიუმის თევზებზე არსებობს უამრავი რესურსი. ინფორმაციის მიღება დაგეხმარებათ ნაკისრ ვალდებულებასთან გამკლავებაში, თანაც ისე, რომ დრო, ფული და ენერგია დაზოგოთ. იკითხეთ სტატიები, უყურეთ ვიდეოებს, გაითვალისწინეთ ცნობილი აკვარიუმისტების რჩევები და უკეთესი გარემო შეუქმენით თევზებს.

გთავაზობთ რამდენიმე ვიდეოს, რომელთა ყურების შემდეგ წარმოდგენა გექნებათ, როგორ გახადოთ აკვარიუმის ბინადრების ცხოვრება უფრო მრავალფეროვანი და, რაც მთავარია, ხანგრძლივი:

გაგრძელება იქნება და შემდეგ სტატიაში სხვა ცხოველების მოვლაზე მოგიყვებით.