მოკლედ: საქართველოს პარლამენტის თავმჯდომარე შალვა პაპუაშვილი აცხადებს, რომ პარლამენტის აკრედიტაცია ჟურნალისტური საქმიანობისთვისაა და მისი "ბოროტად გამოყენება" ჟურნალისტური ეთიკის დარღვევაა.

დეტალები: პაპუაშვილის თქმით, ონლაინმედიის ჟურნალისტებს პარლამენტში შესვლა არა ჟურნალისტური საქმიანობისთვის სურთ, არამედ, მათი მიზანია, მოქალაქეობრივი პოზიცია დააფიქსირონ და პროტესტი გამოხატონ:

  • "ბიუროს სხდომის დროს, პუბლიკას ჟურნალისტი შემოვიდა იმისთვის, რომ პროტესტი გამოეხატა. გუშინაც, მათი [ჟურნალისტების] შემოსვლის მიზანი იყო პროტესტის გამოხატვა, კიდევაც გამზადებული ჰქონდათ პლაკატები".
  • პაპუაშვილის თქმით, საქართველოს პარლამენტში 340 ჟურნალისტია აკრედიტებული, აქედან 290 არის 17 ტელევიზიის წარმომადგენელი, შესაბამისად, 290 ჟურნალისტს თავისუფლად შეუძლია საქართველოს პარლამენტის შენობაში შევიდეს.
  • "ონლაინმედიის ჟურნალისტების რაოდენობა რამდენიმე ათეულია და მათ შეუძლიათ, პარლამენტის გარეთ, საჯაროდ გამოხატონ თავიანთი პოზიცია", — თქვა პაპუაშვილმა.

კონტექსტი: დღეს, 16 აპრილს, პარლამენტის შენობაში ონლაინმედიის ჟურნალისტებს ისევ არ შეუშვებენ.

  • რუსული კანონის საპარლამენტო განხილვების დაწყებიდან უკვე მესამე შემთხვევაა, როდესაც პარლამენტი უარს ეუბნება ონლაინ მედიას, იმუშაოს საკანონმდებლო ორგანოს შენობაში.
  • საგულისხმოა, რომ შალვა პაპუაშვილის ბრძანება ვრცელდება მხოლოდ ონლაინ მედიაზე და არ შეეხება ტელემაუწყებლებს.

ჟურნალისტური ეთიკის ქარტია გუშინ გავრცელებულ განცხადებაში მოუწოდებს საქართველოს პარლამენტს, პატივი სცეს საზოგადოების უფლებას, იყოს ინფორმირებული პარლამენტში მიმდინარე დისკუსიაზე.

  • ასე გამოეხმაურა ორგანიზაცია პარლამენტის გადაწყვეტილებას, რომლის მიხედვით, გუშინ, 15 აპრილსაც უარი ეთქვა ონლაინ მედიას, რუსული კანონის შესახებ საკომიტეტო განხილვების გაშუქებაზე.
  • ქარტია აღნიშნავს, რომ ონლაინ მედიის მიმართ დისკრიმინაციულია ის პრაქტიკა, რომელსაც მმართველი საპარლამენტო გუნდი ამკვიდრებს.