რა მოხდა: დღეს, 3 აპრილს, საქართველოს პარლამენტის თავმჯდომარე შალვა პაპუაშვილმა, პარლამენტის პლენარულ სხდომაზე, რუსული კანონის ხსენების გამო, პარტია მოქალაქეების ლიდერს, ალექსანდრე ელისაშვილს მიკროფონი გაუთიშა და დარბაზიდან გააძევა.

აქცენტი: ამის შემდეგ, On.ge დაინტერესდა, დაარღვია თუ არა პარლამენტის თავმჯდომარემ ერთი მხრივ, პარლამენტის რეგლამენტი და მეორე მხრივ — საქართველოს კონსტიტუცია სიტყვისა და გამოხატვის თავისუფლების შესახებ.

  • On.ge-მ ამ კითხვით მიმართა საქართველოს პარლამენტს, საიდანაც პასუხს ველოდებით;
  • და ვესაუბრეთ ვახტანგ ხმალაძეს, კონსტიტუციონალისტს, რომელიც სამჯერ იყო საქართველოს პარლამენტის არჩეული დეპუტატი, სხვადასხვა წლებში.

შეფასება: "სხდომათა დარბაზიდან პარლამენტის წევრის გაძევება, მხოლოდ მის მიერ გამოთქმული შეხედულების გამო, ეწინააღმდეგება გამოხატვის თავისუფლებას და ხელყოფს პარლამენტის წევრის კონსტიტუციურ უფლებებს", — გვითხრა ვახტანგ ხმალაძემ.

მისივე შეფასებით, დეპუტატის პლენარული სხდომიდან გაძევებით, მხოლოდ იმის გამო, რომ დეპუტატი გამოთქვამდა თავის პოლიტიკურ შეფასებას, პარლამენტის თავმჯდომარემ, შალვა პაპუაშვილმა, საკუთარ უფლებამოსილებას გადააჭარბა.

  • "მისთვის [პარლამენტის თავმჯდომარისთვის] არავის მიუცია ასეთი უფლებამოსილება — არც კანონს არც საპარლამენტო რეგლამენტს.
  • მეორე მხრივ, მან დაარღვია კონსტიტუცია, როცა პარლამენტის წევრის მიმართ, გამოიყენა სანქცია, მაშინ როდესაც პარლამენტის წევრს, ვერავინ მოსთხოვს პასუხს მის მიერ გამოთქმული მოსაზრების გამო", — გვითხრა ხმალაძემ, კონსტიტუციონალისტმა.

რას ამბობს კანონი: საქართველოს კონსტიტუციის 39-ე მუხლის თანახმად,პარლამენტის წევრს სამართლებრივი პასუხისმგებლობა არ დაეკისრება თავისი მოვალეობის შესრულებისას პარლამენტში თუ მის გარეთ გამოთქმული შეხედულებებისათვის.