მოკლედ: საქართველოს პარლამენტის თავმჯდომარე შალვა პაპუაშვილმა, პარლამენტის პლენარულ სხდომაზე, რუსული კანონის ხსენების გამო, პარტია მოქალაქეების ლიდერს, ალექსანდრე ელისაშვილს მიკროფონი გაუთიშა და დარბაზიდან გააძევა.

დეტალები: დღეს, 3 აპრილს, სხდომაზე ალექსანდრე ელისაშვილმა თქვა, რომ მმართველმა პარტიამ, რუსული კანონის კიდევ ერთხელ დაინიცირებით, დეპუტატებს და ქართველ ხალხს შეურაცხყოფა მიაყენა.

  • "ბატონო შალვა, იმ კანონის უკან შემოტრიალება ყველა ჩვენგანისა და ამ ქვეყნის შეურაცხყოფაა, მინდა გითხრათ. ის კანონი არის რუსული და ძახილის ნიშანი! წერილი არა, ძახილის ნიშანი! რატომ არის და იმიტომ. ერთი ერთში გაქვთ ნათარგმნი და იმიტომაა", — განაცხადა ელისაშვილმა.
  • საპასუხოდ, შალვა პაპუაშვილმა თქვა, რომ ელისაშვილის სიტყვები არის "ანტიქართული პროპაგანდა", რის უფლებასაც არ მისცემდა.
  • "ყველას გავუთიშავ მიკროფონს, ვინც ახსენებს რუსულ კანონს", — თქვა პაპუაშვილმა და ელისაშვილს მიკროფონი გაუთიშა.

კონტექსტი: დღეს, 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ განაცხადა, რომ ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

  • მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".

ფართო სურათში: გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.

  • შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.