მოკლედ: 26 საზოგადოებრივი ორგანიზაცია აცხადებს, რომ 2024 წლის 24 მარტს დაგეგმილი მოსამართლეთა კონფერენციის მიზანია კეთილსინდისიერების შემოწმების თავიდან აცილება, რაც "პირდაპირ წინააღმდეგობაში მოდის ევროკომისიის მიერ განსაზღვრულ 9 ნაბიჯთან".

• "კლანი გეგმავს, წარადგინოს მიმართვის პროექტი და მოიპოვოს მოსამართლეთა კორპუსის მხარდაჭერა მათი კეთილსინდისიერების შემოწმების თავიდან ასაცილებლად", — წერია განცხადებაში.

დეტალები: განცხადებაში ნათქვამია, რომ

• კონფერენციის დღის წესრიგის მიხედვით, დაგეგმილია "სასამართლოს ირგვლივ განვითარებული მოვლენების განხილვა".
• განცხადების მიხედვით, გავლენიანი მოსამართლეები, რომლებსაც კეთილსინდისიერების შემოწმების მიმართ ნეგატიური დამოკიდებულება აქვთ, კონფერენციის მონაწილე სხვა მოსამართლეების "ზურგს უკან ამოფარებით", შეეცდებიან თავი დააღწიონ კეთილსინდისიერების ტესტის გავლას.
• ხელმომწერი ორგანიზაციები კონფერენციის მონაწილე თითოეულ მოსამართლეს მიმართავენ, რომ არ დაუშვან იარაღად გამოიყენონ საქართველოს ევროკავშირში ინტეგრაციის წინააღმდეგ.
• "სასწორზე, ერთი მხრივ, ჩვენი ქვეყნის ევროპული მომავალი, მეორე მხრივ კი, მოსამართლეთა გავლენიანი ჯგუფის პირადი ინტერესები დევს, ამიტომაც მოვუწოდებთ, არ დაუშვათ, რომ კლანმა მოსამართლეთა კორპუსი ევროკავშირისკენ საქართველოს წინსვლის შესაფერხებლად გამოიყენოს", — წერენ ორგანიზაციები.

განცხადებაში აღნიშნულია, რომ კეთილსინდისიერების შემოწმებას, ხელისუფლების ლიდერებთან ერთად, "სასამართლო სისტემაში გაბატონებული გავლენიანი მოსამართლეების ჯგუფიც" ეწინააღმდეგება, "ჯგუფი, რომელთა კეთილსინდისიერება დიდი ხანია, ეჭვქვეშ დგას როგორც ქვეყნის შიგნით, ისე მის ფარგლებს გარეთ".

• ორგანიზაციები აცხადებენ, რომ სავარაუდოდ, სწორედ ამ ჯგუფის გამო, 11 მარტს უზენაესმა სასამართლომ გაავრცელა განცხადება, რომელშიც კეთილსინდისიერების შემოწმებას "ღირსების, დამოუკიდებლობის, ინსტიტუციური რეპუტაციის შემლახველ პროცედურად" მოიხსენიებენ.

გაიგე მეტი: დაასრულებს თუ არა კეთილსინდისიერების შემოწმება სასამართლო კლანს

ხელმომწერი ორგანიზაციების მიხედვით, ევროკავშირმა 2024 წლის 22 მარტის განცხადებით, კიდევ ერთხელ დაადასტურა, რომ "სასამართლო სისტემაში არსებული სისტემური ხარვეზების გამოსასწორებლად" საქართველოს მოსამართლეთა კეთილსინდისიერების შესამოწმებელი საგანგებო სისტემის შექმნას ელის.

• "ნაცვლად იმისა, რომ ხელისუფლებას სასწრაფოდ შეემუშავებინა მოთხოვნის შესრულების გეგმა, პრემიერ-მინისტრმა და პარლამენტის თავმჯდომარემ მოსამართლეთა კეთილსინდისიერების შემოწმების საკითხი დახურულად გამოაცხადეს", — წერია განცხადებაში.

ასევე, წაიკითხეთ: ხელისუფლება, მოსამართლეების კეთილსინდისიერების თემის დახურვით, ევროინტეგრაციის პროცესს რისკის ქვეშ აყენებს — არასამთავრობოები

განცხადებას ხელს აწერენ:

1. ქალი და განვითარება
2. ფემინისტური ინიციატივების ფონდი
3. ადამიანის უფლებათა ცენტრი
4. საერთაშორისო გამჭვირვალობა — საქართველო
5. სამოქალაქო იდეა
6. ოჯახები დისკრიმინაციის წინააღმდეგ (FAD)
7. დემოკრატიის მცველები
8. საქართველოს სასამართლოს გუშაგი (Court Watch)
9. ქვემო ქართლის ქალთა ასოციაცია ქალი და სამყარო
10. ბათუმის დამოუკიდებელი ცხოვრების ცენტრი
11. ყვარლის ევროკლუბი
12. შშმ ქალთა ალიანსი
13. დამოუკიდებელი იურისტების ჯგუფი
14. საქართველოს დემოკრატიული ინიციატივა
15. ილიას სამართლის სახლი (ილიასი)
16. დემოკრატიის კვლევის ინსტიტუტი (DRI)
17. მედიაომბუდსმენი
18. საზოგადოება და ბანკები
19. საქართველოს ატლანტიკური საბჭო
20. რეფორმებისა და კვლევის ჯგუფი (RRG)
21. სამოქალაქო საზოგადოების ფონდი
22. უფლებები საქართველო
23. ეკონომიკური პოლიტიკის კვლევის ცენტრი
24. სამოქალაქო ჩართულობისა და აქტივიზმის ცენტრი (CEAC)
25. გურიის სამოქალაქო ცენტრი
26. შავი ზღვის ეკო აკადემია