მოკლედ: დემოკრატიის კვლევის ინსტიტუტი (DRI), მიიჩნევს, რომ სხვისი ნივთის დაზიანებაზე ან ჯგუფურად განადგურებაზე 3-დან 6 წლამდე პატიმრობა, შეუსაბამოა საქართველოს კონსტიტუციასთან, კერძოდ კი — ღირსებისა და თანასწორობის უფლებასთან.

  • ამ ნორმას სისხლის სამართლის კოდექსში 187-ე მუხლის მე-2 ნაწილის "გ" ქვეპუნქტი არეგულირებს.
  • მუხლს DRI საკონსტიტუციო სასამართლოში ასაჩივრებს.

დეტალები: არასამთავრობო ორგანიზაცია იმედს გამოთქვამს, რომ სასამართლოს გადაწყვეტილების საფუძველზე, შესაძლებელი გახდება, "კონსტიტუციასთან შეუსაბამო სისხლის სამართლის ნორმის არაკონსტიტუციურად ცნობა".

  • DRI აღნიშნავს, რომ 187-ე მუხლში "ჯგუფური", როგორც დამამძიმებელი გარემოება, გასული წლის მარტის აქციების შემდეგ, საპარლამენტო უმრავლესობის ინიციატივით ჩაემატა.
  • ამ ცვლილების შედეგად, აქციაზე ნებისმიერი რამის დაზიანება, მათ შორის — ნაკლებად ღირებული ნივთისაც, თუნდაც მხოლოდ 2 პირის მონაწილეობით, დაისჯება პატიმრობით 3-დან 6 წლამდე.

არასამთავრობო ორგანიზაცია ფიქრობს, რომ ეს ახალი ნორმა, შესაძლოა, "შეფარულ მიზანს" ატარებდეს — მითუფრო, თუ გავითვალისწინებთ იმას, რომ ცვლილება რუსული კანონის წინააღმდეგ აქციების შემდეგ მიიღეს.

  • DRI აღნიშნავს, რომ ცვლილებების მიზანშეწონილობა კანონპროექტის განმარტებით ბარათში არ არის მოცემული და ამაზე, ახსნა-განმარტებები საჯაროდ არ გაკეთებულა.
  • გარდა ამისა, მუხლი ალტერნატიულ სასჯელს არ ითვალისწინებს, "ეს ჩანაწერი შესაძლოა კარგად იყოს გამოყენებული საპროტესტო მუხტის ჩასახშობად".

კონტექსტი: DRI-ის მიხედვით, კონსტიტუციური სარჩელის საჭიროება მას შემდეგ დადგა, რაც 2024 წლის 23 იანვარს, თბილისში, კეკელიძის N1-ში, ხატიაშვილების ოჯახის გამოსახლებისას, მხარდამჭერების, აქტივისტებისა და მედიის წარმომადგენლების მიმართ სამართალდამცავებმა "არაპროპორციული ძალა გამოიყენეს" და 20 ადამიანი დააკავეს.

  • "მათგან ორს, რომლებიც კონსტიტუციური სარჩელის მოსარჩელეები არიან, პროკურატურა შსს აღსრულების ეროვნული ბიუროს ავტომობილის დაზიანებას ედავება.
  • დაკავებულებს ბრალი სისხლის სამართლის კოდექსის 187-ე მუხლის მე-2 ნაწილის "გ" ქვეპუნქტით წარედგინათ", — წერს DRI.

სტრიქონებს შორის: 2024 წლის 23 იანვარს, ხატიაშვილების ოჯახის გამოსახლების დროს, გიორგი ხასაია და კაკო ჩიქობავა დააკავეს, მათ აღსრულების პოლიციის მანქანის დაზიანებაში ედებათ ბრალი. ხასია და ჩიქობავა პატიმრობიდან მხოლოდ 3 თებერვალს გათავისუფლდნენ და გირაოს სახით 3000-3000 ლარის გადახდა დაეკისრათ, თუმცა, მათ კვლავ ემუქრებათ 3-დან 6 წლამდე პატიმრობა.

გაიგე მეტი: გამოსახლება კეკელიძის #1-დან — დეტალები ფოტოებში