აჭარის ავტონომიური რესპუბლიკის მთავრობის თავმჯდომარემ, სულხან თამაზაშვილმა ტელეკომპანია "იმედის" ეთერში 20 ივლისს განაცხადა, რომ აქვს ამბიციური გეგმა ქობულეთს აღუდგინოს ტურისტული ჰაბის სტატუსი.

"ქობულეთს ზოგადად ძალიან დიდი პოტენციალი აქვს. მე ვთვლი, რომ აქ გვაკლია მსოფლიო დონის მსხვილი, ბრენდული სასტუმროები. ძალიან საინტერესო ინვესტორებთან ვართ მოლაპარაკების პროცესში. ამბიციური გეგმები გვაქვს, რომ ქობულეთმა აღიდგინოს ტურისტული ჰაბის სტატუსი", — თქვა თამაზაშვილმა.

აჭარის მთავრობის პრესსამსახურის ცნობით, ბათუმის შემოსასვლელში მშენებარე "ამბასადორი ბათუმი აილენდი" ტურისტული ინფრასტრუქტურის განვითარებას შეუწყობს ხელს.

"ბათუმის შემოსასვლელში მშენებარე "ამბასადორი ბათუმი აილენდი" არის ინოვაციური პროექტი, რომელიც შედგება ორი ნახევარკუნძულის და ერთი კუნძულის შერწყმისგან, სადაც მოეწყობა გასართობი, ტურისტული ინფრასტრუქტურა, იქნება პრემიუმ კლასის საცხოვრებელი კორპუსები და სასტუმროები. ეს, მოგეხსენებათ, მნიშვნელოვნად შეუწყობს ხელს ტურისტული ინფრასტრუქტურის განვითარებას," — განაცხადა სულხან თამაზაშვილმა.

მისივე თქმით, 2025 წლის პირველი კვარტლის მონაცემებით აჭარაში ბიზნეს სექტორის მაჩვენებელმა 2,8 მილიონი ლარი შეადგინა, რაც წინა წლის ანალოგიურ მაჩვენებელს 21 პროცენტით აღემატება.

სულხან თამაზაშვილმა აჭარის ავტონომიური რესპუბლიკის მთავრობის თავმჯდომარის პოსტზე თორნიკე რიჟვაძე მიმდინარე წლის 4 აპრილს შეცვალა. რიჟვაძემ პოსტი ფეისბუქ-პოსტით დატოვა, თამაზაშვილი კი ამავე დღეს ირაკლი კობახიძემ წარადგინა მთავრობის თავმჯდომარედ.