რუსეთზე უკრაინის დრონების მასშტაბურმა თავდასხმებმა დღეს, 21 ივლისს მოსკოვის მთავარ აეროპორტებში ქაოსი გამოიწვია. ინფორმაციას Reuters ავრცელებს და რუსული მედიაზე დაყრდნობით წერს, რომ რეისების გაუქმების ან დაგვიანების გამო ათასობით მგზავრს იატაკზე ეძინა.

რუსული მედიის მიერ გამოქვეყნებულ ვიდეოებში ჩანს, როგორ სძინავთ ადამიანებს რუსეთის ყველაზე დატვირთულ, შერემეტიევოს აეროპორტში იატაკზე.

რუსეთის თავდაცვის სამინისტრო აცხადებს, რომ ღამით 117 დრონი ჩამოაგდეს, წინა ღამეს — 172. აქედან 30-30 მოსკოვის რეგიონის თავზე.

რუსეთის სამოქალაქო ავიაციის სააგენტომ, "როსავიაციამ", ღამის განმავლობაში შეზღუდვები დააწესა ფრენებზე მოსკოვის მთავარ აეროპორტებში — შერემეტიევოში, ვნუკოვოში, დომოდედოვოსა და ჟუკოვსკის აეროპორტებში.

რუსული მედიის ცნობით, რუსეთის ევროპულ ნაწილში რეისების გაუქმების გამო, რუსეთის შორეულ აღმოსავლეთში რამდენიმე ათასი ადამიანია ჩარჩენილი, ხოლო რუსეთის ჩრდილოეთით მდებარე ქალაქ სანქტ-პეტერბურგიდან მოსკოვში მგზავრების დასაბრუნებლად დამატებითი მატარებლები დაინიშნა.