პარტია გახარია — საქართველოსთვის პოლიტსაბჭოს წევრმა, ბექა ლილუაშვილმა სოციალურ ქსელში განცხადება გამოაქვეყნა და ქვეყანაში ექსპორტისა და იმპორტის ნიშნულებთან დაკავშირებით კომენტარი გააკეთა. მისი თქმით, ექსპორტში, ყველაზე დიდ წილს ქვეყნიდან ავტომობილების რეექსპორტი აჩვენებს.

"სანამ სამთავრობო პროპაგანდა საგარეო ვაჭრობის მონაცემებზე ტყუილების ტირაჟირებას დაიწყებს, მანამდე რამდენიმე ფაქტი:

1. ქვეყნის მიერ განხორციელებულ ექსპორტში, ყველაზე დიდ წილს, ისე როგორც ყველაზე დიდი ზრდის მაჩვენებელს, ქვეყნიდან ავტომობილების რეექსპორტი აჩვენებს. ეს არის ყველაზე ცხადი და ყველაზე მასშტაბური გამოვლინება იმის, თუ როგორ ხდება საქართველოს იურისდიქციის გამოყენება, სანქცირებული რუსეთის სასარგებლოდ. (ყირგიზეთის და ყაზახეთის გავლით, რომელთაგან 2022 წლის შემდეგ ერთგან 32-ჯერ, ხოლო მეორეგან 54-ჯერ არის გაზრდილი ავტომობილების რეექსპორტი)," — დაწერა ბექა ლილუაშვილმა.

მისივე თქმით, ქვეყანაში ძვირფასი ლითონების ექსპორტი გაიზარდა და ღვინის ექსპორტი შემცირდა.

"2. წლის დასაწყისიდან, ექსპორტის ზრდაში ასევე ფიქსირდება ძვირფასი ლითონების, მათ შორის, ოქროს ექსპორტის მატება — ეს ქვეყნის რა გითხრათ, მაგრამ იმავე კაცისთვისაა სარგებლის მომტანი, რომელმაც 500 მილიონი დოლარის ნახატები გადასახადის გადახდის გარეშე ქვეყანაში შემოაბრძანა.

3. შემცირებული ღვინის ექსპორტიც, და ფეროშენადნობების ექსპორტიც, რომელიც არცაა გასაკვირი იმის ფონზე, რომ თითქმის ყველა მოპოვებითი საქმიანობა — კლანების კონტროლის ქვეშაა და იქ დასაქმებული ხალხი დღემდე შიმშილობს.

სანამ ასე ზარ-ზეიმით გვაჩვევს იკაკო ვიზა ლიბერალიზაციის დაკარგვას, იმას რომ თურმე სამედიცინო დახმარების, სამუშაოდ და ლუკმაპურის საშოვნელად, განათლების მისაღებად და სხვა მიზეზით ევროპაში წამსვლელები — ცეკვის ანსამბლით მოგზაურობის პრაქტიკას უნდა დაუბრუნდნენ — ქვეყნის ეკონომიკა დღითიდღე უფრო და უფრო მძიმე მდგომარეობაში შედის.

ჰა, ახლა დასცხეთ პროპაგანდა!" —დაწერა პარტია გახარია — საქართველოსთვის პოლიტსაბჭოს წევრმა, ბექა ლილუაშვილმა სოციალურ ქსელში.