საფრანგეთის საგარეო საქმეთა მინისტრი ჟან-ნოელ ბარო კიევში ჩავიდა და ვიზიტი უკრაინის დედაქალაქში რუსეთის თავდასხმების შედეგად დაზიანებული ობიექტების დათვალიერებით დაიწყო. ამის შესახებ ინფორმაციას უკრაინის საელჩო საფრანგეთში X-ში ავრცელებს.

"ჟან-ნოელ ბარომ, რომელიც კიევში ჩავიდა ელჩების კონფერენციის საპატიო სტუმრის სტატუსით, ვიზიტი დაიწყო დაბომბვის ადგილიდან. უკრაინას სჭირდება საჰაერო თავდაცვის გაძლიერება," — ნათქვამია საელჩოს განცხადებაში.

ბარო კიევში მას შემდეგ ჩავიდა, რაც ღამით რუსეთმა უკრაინის მიმართულებით 426 დრონი და 24 რაკეტა გაუშვა. ორშაბათს ბარო უკრაინის ელჩების შეხვედრაში მიიღებს მონაწილეობას.

უკრაინული მედიის ცნობით, შეხვედრამდე ერთი დღით ადრე, მსოფლიოს სხვადასხვა ქვეყნიდან უკრაინას ათეულობით დიპლომატიური წარმომადგენლობის ხელმძღვანელი ეწვია. ისინი კიევში ელჩების შეკრებაში მონაწილეობის მისაღებად ჩავიდნენ.

კვირას, პრეზიდენტმა ვოლოდიმირ ზელენსკიმ განაცხადა, რომ საგარეო საქმეთა მინისტრ ანდრეი სიბიგასგან მიიღო ანგარიში, რომელშიც გაწერილია, რომ გარკვეული საელჩოების ხელმძღვანელები შეიცვლებიან.