ტვ პირველის ჟურნალისტმა ქართული ოცნების დეპუტატს, მარიამ ლაშხს ოცნების პრემიერის განცხადებაზე "დღეს კი, ადამიანებს წვავენ იმის გამო, რომ მათ მიაჩნიათ — კაცი კაცია და ქალი ქალია" აზრი ჰკითხა.

ჟურნალისტი: ვინმემ არ იცის ევროპაში, რომ ქალი ქალია და კაცი კაცია?

ლაშხი: მარტო ჩვენი ლიდერებისგან გესმით ეს? ბრიტანეთის, ამერიკის, ევროკავშირის... სხვა ლიდერებიც, რომ ამბობენ ე.ი დღეს ეს საჭიროება დგას. ეს რაღაც უტრირებაა ამ თემის არასწორად.

— რისი გეშინიათ ქართულ ოცნებას?

— ჩვენ არ გვეშინია. ჩვენ გვეშინია ღმერთის, რომ არ მივიღოთ დასჯა იმ არასწორ ქმედებებზე, რაც შეიძლება გამოიწვიოს…

18 ივლისს, ქართული ოცნების პრემიერმინისტრმა, ირაკლი კობახიძემ განაცხადა, რომ საქართველოს ევროკავშირი ვიზალიბერალიზაციას "უწვავს", მხოლოდ იმიტომ, რომ ოცნებას მიაჩნია "კაცი კაცია და ქალი ქალი".

"როდესაც ევროკავშირი გვთხოვს ოჯახური ღირებულებების შესახებ კანონის გაუქმებას, სადაც წერია, რომ კაცი უნდა დარჩეს კაცად, მახსენდება ევროპის შუა საუკუნეების ისტორია, სადაც იყო ინკვიზიცია და ადამიანებს წვავდნენ. ევროპაში ადამიანებს წვავდნენ განსხვავებული აზრის გამო. ჯორდანო ბრუნო დაწვეს იმის გამო, რომ ის ადასტურებდა დედამიწის ბრუნვას. დღეს კი, ადამიანებს წვავენ იმის გამო, რომ მათ მიაჩნიათ — კაცი კაცია და ქალი ქალია. ევროპული ბიუროკრატია გვეუბნება, რომ ამის გამო ვიზალიბერალიზაცია უნდა გაგვიუქმდეს და კოცონზე დაწვან ჩვენი ვიზალიბერალიზაცია," — თქვა კობახიძემ.