უკრაინის სამხედრო დაზვერვის სააგენტოს (HUR) კიბერსპეციალისტებმა რუსული ენერგეტიკული გიგანტის, "გაზპრომის" ქსელური ინფრასტრუქტურის წინააღმდეგ მასშტაბური კიბერშეტევა განახორციელეს, რამაც მნიშვნელოვანი შეფერხებები გამოიწვია. ინფორმაციას უკრაინული მედია ავრცელებს და წერს, რომ "გაზპრომი" და რუსეთის ხელისუფლება გავრცელებულ ინციდენტზე კომენტარს არ აკეთებენ.

სავარაუდო ოპერაცია 17 ივლისს განხორციელდა და მისი სამიზნე "გაზპრომისა" და მისი შვილობილი კომპანიების მიერ გამოყენებული სისტემები იყო, რომლებიც უკრაინის დაზვერვის მტკიცებით, პირდაპირ არიან ჩართულნი რუსეთის ომის მხარდაჭერაში.

ცნობისთვის, "გაზპრომი" რუსეთის სახელმწიფო საკუთრებაში არსებული ენერგეტიკული კომპანიაა, რომელიც მსოფლიოში ერთ-ერთი უდიდესი გაზის მწარმოებელი და ექსპორტიორია.

სავარაუდოდ, კიბერშეტევამ დიდი მოცულობის მონაცემები გაანადგურა და კომპანიის საინფორმაციო სისტემებისთვის დამატებითი ზიანის მისაყენებლად შექმნილი პროგრამული უზრუნველყოფა დააყენა.

"რუსული საინფორმაციო სისტემების ტექნოლოგიურ შუა საუკუნეებამდე დეგრადაცია გრძელდება...

ჩვენ ვულოცავთ რუს "კიბერსპეციალისტებს" ამ ახალ მიღწევას და ვურჩევთ მათ თანდათანობით შეცვალონ მაუსები და კლავიატურები ჩაქუჩებითა და ქინძისთავებით," — განუცხადა HUR-ის წყარომ Kyiv Independent-ს.

უკრაინული მედიის ცნობით, "გაზპრომის" შიდა სისტემებზე წვდომა თითქმის 20 000 ადმინისტრატორს გაუუქმდა და ძირითადი მონაცემთა ბაზების სარეზერვო ასლები წაიშალა. როგორც ამბობენ, შეტევამ დაახლოებით 390 შვილობილი კომპანია და ფილიალი დააზარალა, მათ შორის "გაზპრომ ტეპლო ენერგო", "გაზპრომ ობლ ენერგო" და "გაზპრომ ენერგოზბიტი".

მოგვიანებით, 19 ივლისს, წყარომ განადგურებული მონაცემების შესახებ უკრაინულ მედიას დამატებითი დეტალები მიაწოდა.

"კიბეროპერაციის შედეგად განადგურდა კორპორაციის კონტრაქტების, გრაფიკების და ტარიფების ჩანაწერები, მათ შორის მონაცემები იმის შესახებ, თუ ვის და რამდენი გაზი/ნავთობი უნდა მიეწოდოს, გადახდების, გადასახადების, "გაზპრომის" ფინანსური ბალანსის, კორპორაციის ლიცენზიებისა და იურიდიული შეთანხმებების შესახებ," — ამბობს წყარო მედიასთან.

მისივე თქმით, ასევე განადგურდა წნევის, ხარჯების, გაზის, ნავთობის ბალანსების მართვის სისტემების, "გაზპრომის" ჭაბურღილებისა და ქსელების შესახებ მონაცემები.

წყაროს აქვს ვიდეო და ეკრანის ანაბეჭდები, რომლებიც, როგორც ჩანს, რუსულ მონაცემთა ბაზებში ღრმა წვდომას ადასტურებდა, თუმცა Kyiv Independent-ს მტკიცებულებების ავთენტურობას ვერ ადასტურებს.

წყაროს თქმით, უკრაინელმა ჰაკერებმა რუსული სისტემებიდან წაშლამდე ასობით ტერაბაიტი მონაცემი გადმოწერეს.

წყაროების ცნობით, თავდამსხმელებმა მოახერხეს „უკიდურესად მძლავრი“ სერვერების კლასტერების განადგურება, რომლებზეც მუშაობდა 1C, პროგრამული უზრუნველყოფა, რომელიც ფართოდ გამოიყენება დოკუმენტებისა და კონტრაქტების, მილსადენების, სარქველების, ტუმბოების და SCADA სისტემების ანალიტიკური მონაცემების სამართავად — რაც "გაზპრომის" ტექნიკური ინფრასტრუქტურის ფუნქციონირების ძირითადი ელემენტებია.

როგორც ამბობენ, რამდენიმე სერვერს ოპერაციული სისტემა წაშლილი ან გამორთული ჰქონდა და ბევრი მოწყობილობის BIOS (ძირითადი firmware) დაზიანებული იყო, რაც მათ ფიზიკური შეკეთების გარეშე უმოქმედოს ხდიდა.