მოკლედ: სპეციალურმა საგამოძიებო სამსახურმა, პირადი ცხოვრების საიდუმლოს ხელყოფისა და სექსუალური ხასიათის ქმედების იძულების ფაქტზე, 17 წლის ბიჭი დააკავა.

  • დანაშაული 7 წლამდე პატიმრობას ითვალისწინებს.

დეტალები: გამოძიებით დადგინდა, რომ 2023 წლის ზაფხულში, ბრალდებულს მესენჯერში მიმოწერა ჰქონდა 16 წლის გოგოსთან.

გოგომ ნებაყოფლობით გაუგზავნა საკუთარი ცეკვის ამსახველი ვიდეოჩანაწერი.

  • ბრალდებულმა გოგოს მოსთხოვა ინტიმური შინაარსის ვიდეოს გადაღება, წინააღმდეგ შემთხვევაში, დაემუქრა, რომ ფოტოშოპის მეშვეობით მისი ცეკვის ვიდეოს დაამონტაჟებდა ისე, რომ თითქოს, ის შიშველი იყო. შემდეგ კი ყალბ მასალას გოგოს მშობლებს გაუგზავნიდა.
  • მუქარის შედეგად, დაზარალებულმა გადაიღო ინტიმური შინაარსის ვიდეო და ბრალდებულს გაუგზავნა.
  • ვიდეოს გადაგზავნის შემდეგ, ბრალდებულმა დაზარალებულს სექსუალური ხასიათის ქმედებების განხორციელება, შემდეგ ვიდეოზე გადაღება და გადაგზავნაც მოსთხოვა, უარის შემთხვევაში კი — ინტიმური შინაარსის ვიდეოჩანაწერის მშობლებთან და ნათესავებთან გავრცელებით დაემუქრა.
  • დაზარალებულმა სექსუალური ქმედების ამსახველი ვიდეო ჩაწერა და ბრალდებულს გაუგზავნა.

ბოლო ხაზი: გოგომ სპეციალურ საგამოძიებო სამსახურს მიმართა.

  • ბიჭის პირადი ჩხრეკისას, მობილური ტელეფონიდან ამოიღეს არასრულწლოვანი გოგოს ამსახველი ინტიმური შინაარსის მასალა, ბრალდებული კი დააკავეს.
  • სპეციალური საგამოძიებო სამსახური აღნიშნულ ფაქტზე აგრძელებს გამოძიებას