რა ხდება: გაეროს ბავშვთა სააგენტომ (UNICEF) კვირას, 17 მარტს განაცხადა, რომ ღაზაში, ისრაელის თავდასხმების შედეგად დაღუპული ბავშვების რაოდენობა 13 000-ს აჭარბებს.

  • ორგანიზაციის აღმასრულებელი დირექტორის, ქეთრინ რასელის თქმით, ბევრი ბავშვი შიმშილის ზღვარზეა და "იმდენი ენერგიაც არ აქვთ, რომ იტირონ".

დეტალები: "კიდევ ათასობით [ბავშვი] დაშავდა, მათი ნაწილის ადგილსამყოფელი ჩვენ ვერც კი დავადგინეთ... ისინი, შესაძლოა, ნანგრევების ქვეშ იყვნენ ჩარჩენილი. ჩვენ არ გვინახავს ბავშვების სიკვდილიანობის ამხელა მაჩვენებელი მსოფლიოს თითქმის არც ერთ კონფლიქტში", — განუცხადა რასელმა CBS-ს.

  • "მე ვიყავი პალატაში, სადაც ბავშვები არიან მოთავსებული, არასრულფასოვანი კვების გამოწვეული ანემიის მძიმე ფორმით. პალატაში აბსოლუტური სიმშვიდეა, რადგან ბავშვებს, ჩვილებს ტირილის ენერგიაც კი არ აქვთ", — განაცხადა მან.
  • რასელმა თქვა, რომ არის დიდი ბიუროკრატიული პრობლემები, რათა მოსახლეობის დასახმარებლად ღაზაში სატვირთო მანქანებმა იმოძრაონ.

ომის შედეგად დაღუპულთა რაოდენობის, ღაზაში საკვების კრიზისისა და დახმარების მიწოდების ბლოკირების გამო, ისრაელის მიმართ საერთაშორისო კრიტიკა იზრდება.

  • ღაზას ჯანდაცვის სამინისტროს ცნობით, ისრაელის სამხედრო თავდასხმის შედეგად, ღაზაში ლტოლვილად იქცა თითქმის მთელი მოსახლეობა. ომმა გამოიწვია საკვების კრიზისი, მიწასთან გაასწორა შენობების უმეტესი ნაწილი და იმსხვერპლა 31000-ზე მეტი ადამიანი.
  • ასევე, მოჰყვა გენოციდის ბრალდებების გამოძიება ჰააგის სასამართლოში.
  • ისრაელი უარყოფს გენოციდის ბრალდებას და აცხადებს, რომ ის მოქმედებს თავდაცვის მიზნით, 7 ოქტომბერს ისრაელზე ჰამასის თავდასხმის შემდეგ, რომლის დროსაც, დაახლოებით, 1200 ადამიანი დაიღუპა, ჰამასმა აიყვანა მძევლებიც.