მოკლედ: საპარლამენტო უმრავლესობის წევრი რატი იონათამიშვილი აცხადებს, რომ "არანაირი ვეტინგი არ იქნება", რადგან ის "ნიშნავს მართლმსაჯულების ოკუპაციას და ეს ქვეყნის სუვერენიტეტს აყენებს რისკის ქვეშ".

  • ამის შესახებ იონათამიშვილმა დღეს, 19 მარტს, პარლამენტის პლენარულ სხდომაზე განაცხადა.

მსგავსი: "ეს თემა დახურულია ჩვენთვის" – კობახიძე ვეტინგის შესახებ

დეტალები: რატი იონათამიშვილის თქმით, ბოლო პერიოდში "ურეიტინგო ენჯეოებისგან" და პარტიებისგან ხშირად ესმის ვეტინგზე საუბარი.

  • მისი თქმით, არასამთავრობო ორგანიზაციები, რომლებიც ვეტინგზე საუბრობენ, არიან ისინი, ვინც "ანგარიშს ანგარიშზე წერდნენ და ფაქტობრივად, ევროპულ სტრუქტურებში გადაწყვეტილების მიმღებ პირებს მოუწოდებდნენ, რომ საქართველოს მიმართ დადებითი გადაწყვეტილება არ მიეღოთ".
  • ხოლო პარტიები არიან "კრებითი ადამიანები, რომლებიც საქართველოს გულშემატკივრობით კი არ მოქმედებენ, არამედ ცდილობენ ყველანაირად ჩირქი მოცხონ და ძირი გამოუთხარონ ჩვენს სახელმწიფოს, ჩვენს სუვერენიტეტსა და დემოკრატიას".
  • იონათამიშვილი აღნიშნავს, რომ ამ პარტიებს ჰყავთ მმართველი "მისტერ ოფშორის ანუ კეზერაშვილის სახით, რომელიც ქართული მართლმსაჯულების მიერ არის მსჯავრდადებული".

გარდა ამისა, იონათამიშვილმა თქვა, რომ საზოგადოებაში სასამართლოს მიმართ ნდობა იზრდება.

  • "ქართულმა სასამართლოებმა არაერთხელ წარმატებით ჩააბარეს სტრასბურგის სასამართლოს ტესტი. ჩვენი სასამართლო საერთაშორისო ავტორიტეტულ რეიტინგებში მოწინავე პოზიციას იკავებს", — განაცხადა რატი იონათამიშვილმა.

კონტექსტი: ევროკომისიამ, სასამართლო სისტემის გაჯანსაღებისთვის 2023 წლის 11 ნოემბრის ანგარიშში დაწერა, რომ:

  • "საჭიროა იუსტიციის უმაღლესი საბჭოს უფრო საფუძვლიანი და ყოვლისმომცველი რეფორმა, რათა დაეხმაროს სასამართლო ხელისუფლების დამოუკიდებლობისა და მიუკერძოებლობის შემდგომ კონსოლიდაციას, გააუმჯობესოს საზოგადოების ნდობა და გადაჭრას საჯაროდ აღქმული კორპორატივიზმისა და კეთილსინდისიერების პრობლემები იუსტიციის უმაღლეს საბჭოში.
  • სისტემური გამოწვევების გადასაჭრელად, როგორც ვენეციის კომისიამაც აღნიშნა 2023 წლის ოქტომბრის დასკვნაში, საჭიროა, უფრო საფუძვლიანი და სისტემური კეთილსინდისიერების შემოწმება, რეგიონში დამკვიდრებული საუკეთესო პრაქტიკის შესაბამისად, ევროკომისიასთან და ვენეციის კომისიასთან კონსულტაციებით".

მართლმსაჯულებაში რეფორმების აუცილებლობაზე საუბარია ევროკომისიის 9 დათქმაშიც, რაც ჩვენი ევროკავშირში გაწევრიანების საწინდარი უნდა იყოს.

უფრო კონკრეტულად, მეექვსე პუნქტში ვკითხულობთ:

  • "ყოვლისმომცველი და ეფექტური სასამართლო რეფორმის დასრულება და განხორციელება, მათ შორის, იუსტიციის უმაღლესი საბჭოსა და პროკურატურის ყოვლისმომცველი რეფორმა, ვენეციის კომისიის რეკომენდაციების სრულად შესრულება გამჭვირვალე და ინკლუზიური პროცესის გზით".

გაიგე მეტი: დაასრულებს თუ არა კეთილსინდისიერების შემოწმება სასამართლო კლანს