ჩეჩნეთში, 15-17 მარტის არჩევნებზე, ამომრჩეველთა აქტივობა 97% იყო — ყველაზე მაღალი მაჩვენებელი მთელ რუსეთში.

ყაბარდო-ბალყარეთში აქტივობამ 93%, ჩრდილოეთ ოსეთი, ყარაჩაი-ჩერქეზეთსა და ინგუშეთში 90%, ხოლო სტავროპოლის მხარეში — 89% შეადგინა.

ოფიციალური შედეგებით, ვლადიმერ პუტინმა ჩეჩნეთში ხმების 99% მიიღო, რაც ყველაზე მაღალი მაჩვენებელია რუსეთის რეგიონებს შორის.

ყაბარდო-ბალყარეთში მან მიიღო 92%, ხოლო 90% — ყარაჩაი-ჩერქეზეთში, ჩრდილოეთ ოსეთსა და ინგუშეთში.

არჩევნების შედეგად, ვლადიმირ პუტინი მეხუთე ვადით გახდა პრეზიდენტი, იმ ფონზე, რომ სერიოზული მოწინააღმდეგეები ან დააპატიმრეს, ან მოკლეს, ან — არჩევნებში მონაწილეობა აუკრძალეს.

ჩეჩნეთის საარჩევნო კომისიამ კვირას განაცხადა, რომ ხმის მიცემის დროს დარღვევები არ დაფიქსირებულა. სახელმწიფო არხი ChGTRK Grozny იმავე დღეს წერდა, რომ არჩევნები ჩატარდა "სადღესასწაულო ატმოსფეროში".

თუმცა, ტელეგრამის არხმა და მონიტორინგის ორგანიზაციამ, სახელწოდებით "ხმის მიცემის დღის ქრონიკა", გამოაქვეყნა ანონიმური ჩეჩენი საჯარო მოხელის შეტყობინება, რომელშიც ნათქვამია, რომ საჯარო სამსახურების თანამშრომლებს აიძულებდნენ ხმის მიცემას რამდენიმე უბანზე, რამდენიმე დღის განმავლობაში, რაც ცნობილია როგორც "კარუსელი".

"პირველ დღეს მომთხოვეს სამჯერ მივსულიყავი და მიმეცა ხმა სამ სხვადასხვა უბანზე, ალბათ, ამ აქტივობის უზრუნველსაყოფად. მეორე დღეს კიდევ ოთხჯერ "ავირჩიე". დღეს მათ რამდენიმე სკოლაში დამიბარეს, იქ უნდა მივიდე”, — ეწერა შეტყობინებაში.

ასევე, ამ ორგანიზაციის ინფორმაციით, საჯარო მოხელეებს ჩეჩნეთის სხვადასხვა საარჩევნო უბანზე ავტობუსებითა და მიკროავტობუსებით ატარებდნენ. საარჩევნო უბნებზე მომუშავე პირებს კი ბიულეტენების ჩაყრაზე რეაგირება არ ჰქონიათ.

დაღესტნისა და ჩეჩნეთის საარჩევნო უბნებზე, კენჭისყრის დროს, ვლადიმირ პუტინის ოფიციალური პორტრეტები ეკიდა.

"კავკაზსკი უზელი" იტყობინება, რომ ჩრდილოეთ კავკასიაში საარჩევნო კამპანიის დარღვევები არჩევნებამდეც დაფიქსირდა. გავრცელებული ინფორმაციით, ჩრდილოეთ ოსეთის სახელმწიფო უნივერსიტეტმა ტელეგრამის არხზე გამოაქვეყნა მასალა ერთ-ერთი საპრეზიდენტო კანდიდატის კამპანიის შესახებ, რომელშიც გამოსახულია მასწავლებლისა და სტუდენტების ფოტო, რომლებიც დგანან კამპანიის ბანერის წინ. საჩივრების შემდეგ, პოსტი წაიშალა.

გავრცელებული ინფორმაციით, ერთ-ერთი კანდიდატის შტაბმა, ასევე, მოაწყო ექსკურსია უნივერსიტეტის სტუდენტებისთვის ჩერკესკში, ეკლესიისა და კაზაკების ისტორიის მუზეუმში, რასაც მოჰყვა კრიტიკა, როგორც "ადმინისტრაციული რესურსების ბოროტად გამოყენებას".

აქტივისტების დაკავება

გავრცელებული ინფორმაციით, რამდენიმე პირი დააკავეს პუტინის წინააღმდეგ კამპანიის ჩატარების, ან არჩევნების პროცესის ხელის შეშლისთვის.

რადიო თავისუფლების ცნობით, აქტივისტი იბრაგიმ პარკუევი 16 მარტს, დაღესტნის დედაქალაქ მაჰაჩყალაში, პოლიციელის მოთხოვნების დაუმორჩილებლობის ბრალდებით დააკავეს. პარკუევმა მანამდე ოპოზიციონერი პოლიტიკოსის ალექსეი ნავალნის მხარდაჭერა გამოხატა.

ერთი დღის შემდეგ, მაჰაჩყალაში 16 წლის სტუდენტის წინააღმდეგ ადმინისტრაციული საქმე აღიძრა. Sapa Kavkaz იტყობინება, რომ სტუდენტს აღმოაჩნდა ბუკლეტები, რომლებიც ეხებოდა საპროტესტო კამპანიას "შუადღე პუტინის წინააღმდეგ“. ერთი ბუკლეტი მისი კოლეჯის ღობეზეც იყო მიმაგრებული. სტუდენტს 2000 რუბლამდე ჯარიმა ემუქრება.

კამპანიის "შუადღე პუტინის წინააღმდეგ" ინიციატორი ალექსეი ნავალნი იყო. ის და მისი ცოლი, იულია ნავალნაია მოუწოდებდნენ პუტინის მოწინააღმდეგეებს, კენჭისყრის ბოლო დღეს, 12:00 საათზე მასობრივად შეკრებილიყვნენ საარჩევნო უბნებზე, ხმის მისაცემად, ან — მათი ბიულეტენის გასაფუჭებლად.

ყარაჩაი-ჩერქეზეთში 15 მარტს საარჩევნო ყუთში ფერადი საღებავის ჩასხმის შემდეგ, ქალი დააკავეს. ქალი დაკითხვაზე საგამოძიებო კომიტეტში გადაიყვანეს, რესპუბლიკის საარჩევნო კომისიის თავმჯდომარემ კი განაცხადა, რომ მომხდარის მიუხედავად, ხმები და ყუთიდან ამოღებული ბიულეტენები დაითვლებოდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.