მოკლედ: უცხო ქვეყნის მოქალაქეს, სასამართლოს გადაწყვეტილებით, დაახლოებით, 1 100 000 აშშ დოლარად ღირებული უძრავ-მოძრავი ქონება ჩამოერთვა.

  • პროკურატურის ინფორმაციით, პირს ქონება უკანონო და დაუსაბუთებელი წარმომავლობის თანხით ჰქონდა შეძენილი.
  • მას 10-წლიანი პატიმრობაც მიესაჯა.

დეტალები: პროკურატურის გამოძიების დადგინდა, რომ

  • მსჯავრდადებულმა მასთან დანაშაულებრივ კავშირში მყოფ პირებთან ერთად, შექმნა საერთაშორისო საინვესტიციო თაღლითობაზე დაფუძნებული პლატფორმა FORSAGE, რომლითაც დაზარალებულებს, ფულადი ინვესტიციების სანაცვლოდ, სხვადასხვა ოდენობით სარგებელს ჰპირდებოდნენ.
  • 2020 – 2022 წლებში, დამფუძნებლებმა პლატფორმაზე, დაახლოებით, 340 000 000 აშშ დოლარის კაპიტალიზაცია მოახდინეს, რის შემდგომაც "თაღლითურ პირამიდულ სქემაში მაღალ პოზიციებზე მყოფი პირები თანხის მნიშვნელოვან ნაწილს მართლსაწინააღმდეგოდ დაეუფლნენ და პლატფორმა გააუქმეს".
  • დანაშაულის ერთ-ერთმა ორგანიზატორმა, თანხების წარმომავლობის დაფარვის მიზნით, საქართველოში ეტაპობრივად შემოიტანა დაახლოებით 3 500 000 ლარის ეკვივალენტი თანხა და დანაწევრებით განათავსა პირად და მასთან დაკავშირებული ფიზიკური პირების საბანკო ანგარიშებზე.
  • შემდგომში, მსჯავრდადებულმა თანხის ნაწილი ლეგალურ ეკონომიკურ ბრუნვაში გაუშვა, მათ შორის, შეიძინა ძვირადღირებული უძრავ-მოძრავი ქონება.

ბოლო ხაზი: პროკურატურის მიხედვით, მოცემულ ფაქტზე, დანაშაულში მონაწილე რამდენიმე პირს ბრალდება ამერიკის შეერთებული შტატების კომპეტენტური ორგანოების მიერ კომპიუტერული თაღლითობისთვის წარედგინათ.