მოკლედ: ხატია დეკანოიძე აცხადებს, რომ ქვეყანაში ქალების პრობლემაა, რომ მათ პირდაპირი მნიშვნელობით კლავენ, ამის შესახებ კი არასდროს შექმნილა კონკრეტული პოლიტიკის დოკუმენტები არცერთი ხელისუფლების პერიოდში.

  • ქალთა მიმართ ძალადობასა და ფემიციდზე დღეს, 5 მარტს, ოპოზიციონერმა დეპუტატმა პარლამენტის პლენარულ სხდომაზე ისაუბრა.

დეტალები: დეკანოიძის თქმით, ფემიციდი სერიოზული პრობლემაა და ამ თემაზე მამაკაცი დეპუტატები ყურადღებას არ ამახვილებენ.

  • "მინდა ხაზი გავუსვა იმას, რომ არ მახსენდება უმრავლესობის წევრი არც ერთი კაცი და ასევე, გულისტკივილით უნდა ვთქვა, ძალიან იშვიათად მახსენდება ოპოზიციიდან გამოსული კაცი, რომელიც ისაუბრებდა ქალების მკვლელობაზე და რა უნდა გაკეთდეს ქვეყანაში იმისთვის, რომ ქალები აღარ მოკლან", — თქვა დეკანოიძემ და აღნიშნა, რომ "რამდენიმე დღის წინ მოკლეს ახალგაზრდა ქალი, აჩეხეს და ამასთან დაკავშირებით ხელისუფლებას, სახელმწიფოს არ გაუკეთებია არც ერთი მინიშნებაც კი, როგორ უნდა ვებრძოლოთ ამ ძალიან მძიმე პრობლემას და გამოწვევას."

სტრიქონებს შორის: 2024 წლის 28 თებერვალს დააკავეს ბიჭი, რომელმაც თბილისში, ლილოს დასახლებაში, ურთიერთშელაპარაკების ნიადაგზე, 21 წლის გოგოს სასიკვდილო ჭრილობა მიაყენა და ადგილიდან მიიმალა.

ბოლო ხაზი: დეკანოიძემ აღნიშნა ისიც, რომ საქართველოს პროკურატურას ფემიციდთან დაკავშირებით 2023 წლის სტატისტიკა ჯერ კიდევ არ გამოუქვეყნებია.

მნიშვნელოვანია ვიცოდეთ, რომ ოჯახში ძალადობა არ გულისხმობს მხოლოდ ფიზიკურ შეხებას. ოჯახის წევრის მხრიდან ფსიქოლოგიური ზეწოლა, მუქარა, შანტაჟი, სიტყვიერი შეურაცხყოფა ასევე ძალადობაა და კანონით აკრძალულია.

  • ოჯახში ძალადობის შემთხვევაში პოლიციის გამოძახება შესაძლებელია 112-ზე დარეკვით. ზარი უფასოა.
  • საკონსულტაციო მომსახურების გაწევის მიზნით ფუნქციონირებს ცხელი ხაზი — 116 006.

საჭიროების შემთხვევაში შეგიძლიათ დარეკოთ შემდეგ ნომრებზე:

  • საფარის უფასო იურიდიული დახმარება — 0322 30 76 03; 599 40 76 03;
  • სახალხო დამცველის ცხელი ხაზი — 1481