საქართველოს პარლამენტის დეპუტატის და პატრიოტთა ალიანსის წევრის, ირმა ინაშვილის აზრით, ვანოს შოუს წამყვანი და იუმორისტი ვანო ჯავახიშვილი დანაშაულს სჩადის. ამის შესახებ ინაშვილი ფეისბუკზე წერს:

"რასაც ვანო ჯავახიშვილი იუმორს უწოდებს, ის სინამდვილეში ცილისწამება, ტყუილი, ადამიანების აბუჩად აგდება, ღირსების შელახვა, დამცირებაა და ეს დასჯადი დანაშაულია. რეალურად ესაა დანაშაული ადამიანურობის წინააღმდეგ."

ინაშვილი მიიჩნევს, რომ რუსთავი 2 და ვანო ჯავახიშვილი საქართველოს ექს-პრეზიდენტის, მიხეილ სააკაშვილის დავალებებს ასრულებენ.

"იუმორი მათთვის პოლიტიკური ოპონენტების განადგურების, მათი იმიჯის დაზიანების საშუალებაა და სხვა არაფერი. ეს "იუმორი" ფული ღირს. ეს "იუმორი" პოლიტიკური დაკვეთაა და ამ დაკვეთაზე, მის ორგანიზატორებსა და შემსრულებლებზე ღიად ვისაუბრებ მომავალი კვირიდან", - წერს ინაშვილი.

პატრიოტთა ალიანსის კიდევ ერთი წევრი, ემზარ კვიციანი კი ფიქრობს, რომ მილიარდერი ფილანთროპი, ჯორჯ სოროსი მსოფლიოში თავისი გავლენის გასაზრდელად ვანო ჯავახიშვილის მოკვლას გეგმავს. კვიციანის პასუხად კი რუსთავი 2-ის გენერალური დირექტორი ამბობს, რომ დეპუტატის განცხადება ირიბი მუქარაა.