უკვე მეორე წელია, საქართველოს ბანკი და კომაროვის სკოლა ერთობლივ პროექტს — STEM სკოლას ახორციელებენ. პროექტის მიზანი ზუსტი და საბუნებისმეტყველო მეცნიერებებით დაინტერესებული მე-7, მე-8, მე-9 და მე-10 კლასის მოსწავლეებისთვის STEM მიმართულებით ხარისხიან განათლებაზე ხელმისაწვდომობის გაზრდაა.

პროექტის ფარგლებში, ახალგაზრდები იღებენ როგორც თეორიულ, ასევე პრაქტიკულ ცოდნას ინჟინერიის, ფიზიკისა და ტექნოლოგიების მიმართულებით, რაც დაეხმარება მათ, შეიქმნან ბაზისი მომავალი პროფესიებისთვის. STEM სკოლაში სწავლის სურვილი ათასობით მოსწავლემ გამოთქვა. პროექტისთვის მონაწილეების შესარჩევად ახალგაზრდებს ტესტი უტარდებათ, სკოლაში სწავლას კი მაღალი ქულების მქონე ახალგაზრდები აგრძელებენ. საუკეთესო შედეგის მქონე რამდენიმე ათეულ მოსწავლეს კი საქართველოს ბანკი STEM სკოლაში სწავლას სრულად უფინანსებს.

საქართველოს ბანკის მიზანია, ხარისხიანი განათლება ყველასათვის თანაბრად ხელმისაწვდომი გახადოს. სწორედ ამიტომ, STEM სკოლაში სწავლა დისტანციურ რეჟიმში მიმდინარეობს. რაც ნიშნავს იმას, რომ გაკვეთილებზე დასწრება საქართველოს ფარგლებში, ნებისმიერი წერტილიდან არის შესაძლებელი.

STEM სკოლაში მიღებული გამოცდილების შესახებ კი ქუთაისის №41 ფიზიკა-მათემატიკური სკოლის მე-8 კლასის მოსწავლეები გვიყვებიან.

"STEM განათლება აერთიანებს მეცნიერებას, ტექნოლოგიებს, ინჟინერიასა და მათემატიკას, სკოლის პროგრამის ფარგლებში კი მხოლოდ საბუნებისმეტყველო მეცნიერებებსა და მათემატიკასთან გვაქვს შეხება. ჩვენ ტექნოლოგიური პროგრესის ეპოქაში ვცხოვრობთ, ამიტომ ძალიან დიდი სურვილი მქონდა, შემესწავლა ინჟინერია და მეტი გამეგო ტექნოლოგიებისა და ამ ოთხივე კომპონენტის ურთიერთკავშირის შესახებ. STEM სკოლამ ჩემი მოლოდინები გაამართლა, რისთვისაც პროექტის შემქმნელებისა და პედაგოგების მადლობელი ვარ," — ამბობს პროექტის მონაწილე, თეკლა ჩოგოვაძე.

თეკლა განმარტავს, რომ STEM სკოლაში სწავლის პროცესი ძალიან სახალისო და საინტერესოა. ამასთან, პროექტი აძლევს მას შესაძლებლობას, გაიცნოს სხვადასხვა რეგიონის ნიჭიერი თანატოლები.

"სწავლების პერიოდში ჩემთვის ყველაზე საინტერესო წრედების აწყობის პროცესი იყო, რაც მომავალში ტექნოლოგიების მარტივად შექმნაში დაგვეხმარება. STEM მეცნიერება მსოფლიოს მასშტაბით ძალიან ვითარდება, ამიტომ დიდი სურვილი მაქვს, სწავლა ამ მიმართულებით განვაგრძო", — ამბობს თეკლა ჩოგოვაძე.

ანასტასია კუჭავას კი ყველაზე მეტად კოდის წერა მოსწონს.

"ჩემი მეგობრები ამ პროექტში შარშან ჩაერთნენ, ამიტომ STEM სკოლის შესახებ თავიდანვე ბევრი რამ ვიცოდი. მოლოდინი მქონდა, რომ სწავლის პროცესი საინტერესო, ინოვაციური, აქტუალური და მხიარული იქნებოდა. ჩემი მასწავლებლის, უტა კილასონიას, გაკვეთილებმა მოლოდინს გადააჭარბა. STEM სკოლის თითოეული შეხვედრა თავისებურად საინტერესო და გამორჩეული იყო. განსაკუთრებით გამოვარჩევდი კოდის წერის კურსს. პირველად დაწერილი კოდის შედეგად ამუშავებულმა სისტემამ უდიდესი სიხარული მომანიჭა", — ამბობს ანასტასია.

განმარტავს, რომ STEM სკოლა ეხმარება მას, სიღრმისეულად გაერკვეს მრავალ, მისთვის საინტერესო საკითხში.

"ყველაზე საინტერესო გაკვეთილები ალბათ ჯერ კიდევ წინაა. დღეს ჩვენი თაობა ინდუსტრიული ევოლუციის მოწმეა. ვხედავთ ხელოვნური ინტელექტის რობოტებსა და ინტერნეტის შესაძლებლობებს. ტექნოლოგიებმა და ინოვაციებმა მისეულად უნდა გარდაქმნან სამყარო, რაც ბოლო პერიოდში დაჩქარებული ტემპით მიმდინარეობს. ამიტომ, მხოლოდ სასკოლო საგნების შესწავლა აღარ იქნება საკმარისი. ჩემს მომავალ პროფესიასაც ალბათ STEM მიმართულებას დავუკავშირებ", — ამბობს მე-8 კლასის მოსწავლე, ანასტასია კუჭავა.

პროექტის მონაწილეები აღნიშნავენ, რომ STEM სკოლა განსაკუთრებულია, რადგან აძლევს მათ ისეთ ცოდნას და გამოცდილებას, რომლის მიღების შესაძლებლობაც აქამდე სკოლაში არ ჰქონიათ. ამასთან, გარდა იმისა, რომ STEM სკოლის გაკვეთილები საინტერესოდ მიმდინარეობს, სწავლის პროცესი შემეცნებითი და სახალისოცაა.

"STEM სკოლაზე ჩემი კლასელებიდან ბევრი რამ უკვე ვიცოდი, ამიტომაც ზოგადი წარმოდგენა თავიდანვე შექმნილი მქონდა. ვიცოდი, რომ ისეთ რაღაცებს ვისწავლიდი, რაც რეალობაში გამომადგებოდა და მართალიც აღმოვჩნდი, თუმცა ამასთან ერთად STEM სკოლა ბევრი სხვადასხვა უნარის გაუმჯობესებაზეა კონცენტრირებული. აქ ბევრ საინტერესო საკითხზეა საუბარი, რაც ძალიან მომწონს. ზოგადად, მინდოდა ინჟინერია უკეთ შემესწავლა და ეს პროექტი ნამდვილად დამეხმარა ჩემი მიზნის მიღწევაში. ვფიქრობ, STEM სკოლა ძალიან კარგი შესაძლებლობაა ყველასთვის, ისწავლონ ისეთი საკითხები, რომლებსაც ჩვეულებრივ სკოლებში ვერ ისწავლიან, მით უმეტეს, თუ აპირებენ მომავალი ინჟინერიას ან რაიმე მსგავსს პროფესიას დაუკავშირონ", — ამბობს STEM სკოლის პროექტის მონაწილე, გიორგი ჯვარშეიშვილი.

STEM სკოლაში სასწავლო პროცესი აქტიურად მიმდინარეობს. მათ, ვინც სასწავლო კურსს წარმატებით გაივლის, სერტიფიკატიც გადაეცემა. აღსანიშნავია, რომ STEM სკოლაში სწავლა 400-მდე მოსწავლემ დაიწყო, ხოლო საქართველოს ბანკის სტიპენდია 100-მდე მოსწავლემ მიიღო.