ინსტაგრამზე ან ტიკტოკზე თუ ლიტერატურის მიმომხილველ კონტენტ-კრეატორებს თვალს ადევნებ, ბოლო თვეებში უთუოდ ხშირად მოგხვდებოდა თვალში ერთი დასახელება — Alchemised. ფენტეზის ჟანრის ეს სქელტანიანი რომანი, რომელიც თავდაპირველად ჰარი პოტერისა და მხევლის წიგნის ფანფიქცია იყო, სექტემბერში გამოიცა, მაგრამ უკვე ბესტსელერად იქცა, ითარგმნა 23 ენაზე და ეკრანიზების უფლება რეკორდულად მიჩნეულ შვიდნიშნარიცხვიან ჰონორარად გაიყიდა. ნაწარმოებს მალე მშობლიურ ენაზეც წავიკითხავთ — წიგნის ქართულ თარგმანზე მუშაობა დაწყებულია.

Alchemised-ის ავტორი 34 წლის ამერიკელი დებიუტანტი მწერალი სენლინიუა. ნაწარმოებზე მუშაობას იგი 2022 წლის მიწურულს შეუდგა და ფანფიქციად ჩაფიქრებული ისტორია Manacled-ად დაასათაურა. ჰარი პოტერის ფანებში საკმაოდ პოპულარულია დრაკო მალფოისა და ჰერმიონ გრეინჯერის "დაწყვილება" და სენლინიუს ამბავიც ამ რომანტიკული ხაზით დაიწყო. ავტორის თქმით, ფენტეზი ბავშვობიდან უყვარდა, მაგრამ თავად დაწერას არ ჩქარობდა, რადგან ფიქრობდა, რომ "ცხოვრებისეული გამოცდილება" აკლდა. თუმცა, ერთხელაც, იფიქრა, რომ "სათანადო პერსპექტივის" ძიებაში მთელი ცხოვრება შეიძლებოდა გასულიყო და წერა დაიწყო. წერდა თავისი ტელეფონის ჩანაწერების აპლიკაციაში, სანამ მის მცირეწლოვან შვილს ეძინა. Manacled ინტერნეტში დიდი პოპულარობით სარგებლობდა — ნაწარმოები ოც მილიონზე მეტჯერ ჩამოტვირთეს.

ჯერ კიდევ ფანფიქციის წერის დასრულებამდე, სენლინიუმ ლიტერატურულ სააგენტოსთან გააფორმა ხელშეკრულება და 2024 წელს ნაწარმოების გამოცემის უფლებებიც გაიყიდა. გამოცემამდე წიგნი ავტორმა გადაწერა: მართალია, Alchemised-ის სიუჟეტი მეტწილად ფანფიკის მსგავსია, მაგრამ წაშლილია ჰარი პოტერის კვალი და შეცვლილია როგორც სამყარო, ასევე მაგიის სისტემა.

ფანების დიდი მოლოდინიდან გამომდინარე, Alchemised-ის პირველი ტირაჟი 750 ათას ეგზემპლარს შეადგენდა. წინასწარი შეკვეთების რაოდენობით, წიგნმა გამომცემლობა Penguin Books-ის წლის რეკორდიც მოხსნა. გამოცემამდე კინოკომპანია Legendary Entertainment-მა ნაწარმოების ეკრანიზაციის უფლებაც შეიძინა.

რაც შეეხება ქართულ თარგმანს, Alchemised-ს ახალი ქართული გამომცემლობა მოუბარი გამოსცემს. მოუბარი პირველად წლევანდელ წიგნის დღეებზე გამოჩნდა რვა ახალი გამოცემით, მათ შორისაა ბოლო დროის კიდევ ერთი ბესტსელერი, რებეკა იაროსის მეოთხე ფრთა და ტომ ფელტონის ავტობიოგრაფიული რომანი.

Alchemised-ს ქართულად ნინო შეყილაძე თარგმნის. შეყილაძეს ფენტეზის ჟანრის არაერთი წიგნი აქვს ნათარგმნი, მათ შორის, კლაივ ს. ლუისის ნარნიის ქრონიკები და სარა ჯ. მაასის ეკლებისა და ვარდების სამეფო.

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...