მოკლედ: 2023 წელს, საქართველოს აეროპორტები რეგულარული და არარეგულარული რეისებით, 6 013 995 მგზავრს მოემსახურა. სამოქალაქო ავიაციის სააგენტო ამბობს, რომ ეს მგზავრთნაკადის რეკორდული მაჩვენებელია ქვეყნისთვის.

დეტალები: სამოქალაქო ავიაციის სააგენტოს მიხედვით, 2023 წელს მიღებული მგზავრების რაოდენობა 35%-ით მეტია 2022 წლის ანალოგიურ პერიოდში გადაყვანილი მგზავრების რაოდენობაზე.

  • 2023 წელს თბილისის საერთაშორისო აეროპორტი 3 694 052 მგზავრს მოემსახურა. ზრდა 2022 წლის ანალოგიურ პერიოდთან შედარებით 23%-ს შეადგენს;
  • 2023 წელს ქუთაისის საერთაშორისო აეროპორტის მეშვეობით გადაყვანილ იქნა 1 671 198 მგზავრი. მგზავრთნაკადის ზრდა 2022 წელთან შედარებით 110%-ს შეადგენს;
  • 2023 წელს ბათუმის საერთაშორისო აეროპორტი 621 514 მგზავრს მოემსახურა. ზრდა 2022 წელთან შედარებით 0.75%-ია;

რაც შეეხება ადგილობრივი დანიშნულების აეროპორტებს: მესტია, 2023 წლის დაჯამებული მონაცემებით, 10 217 მგზავრს მოემსახურა, რაც 9%-ით მეტია ვიდრე 2022 წელს გადაყვანილი მგზავრების რაოდენობა.

  • ამბროლაურის აეროპორტმა 2023 წელს 2 225 მგზავრი მიიღო, რაც 16%-ით ჩამორჩება 2022 წელს მომსახურებული მგზავრების რაოდენობას;
  • 2023 წელს ნატახტარის აეროპორტი 14 789 მგზავრს მოემსახურა, 2022 წელთან მიმართებაში კლება 16%-ს შეადგენს.

ავიაკომპანიების რეიტინგი საქართველოში: 2023 წელს გადაყვანილი მგზავრების რაოდენობის მიხედვით, საქართველოს საავიაციო ბაზარზე Wizz Air-ი ლიდერობს. ავიაკომპანია ბაზრის 21%-იან წილს ფლობს და 1 270 737 მგზავრი ყავს გადაყვანილი.

რეგულარული და ჩარტერული რეისებით გადაყვანილი მგზავრების რაოდენობის/პროცენტული წილის მიხედვით პირველი ათეული ასე გამოიყურება:

1. Wizz Air Hungary – 21% (1 270 737 მგზავრი);

2. Turkish Airlines – 11% (627 078 მგზავრი);

3. Pegasus – 7% (423 655 მგზავრი);

4. Georgian Airways – 5% (326 873 მგზავრი);

5. Azerbaijan Airlines – 5% (324 044 მგზავრი);

6. Fly Dubai – 4% (218 433 მგზავრი);

7. El Al Israel Airlines – 3% (202 469 მგზავრი);

8. Belavia – 3% (184 117 მგზავრი);

9. Israir – 3% (182 941 მგზავრი);

10. Air Arabia – 3% (155 303 მგზავრი).