რა ხდება: ევროკავშირის წარმომადგენლობა საქართველოში განცხადებას ავრცელებს.

  • ისინი ეხმიანებიან ოკუპირებულ აფხაზეთში, ბიჭვინთის აგარაკის რუსეთისთვის გადაცემის შესახებ მიღებულ გადაწყვეტილებას.
  • "ევროკავშირი სრულად მხარს უჭერს საქართველოს ტერიტორიულ მთლიანობასა და სუვერენიტეტს ქვეყნის საერთაშორისოდ აღიარებულ საზღვრებში.
  • ნებისმიერი გადაწყვეტილება, რომელიც ძირს უთხრის საქართველოს ტერიტორიულ მთლიანობას, როგორიცაა აფხაზეთის ოკუპირებული თვითგამოცხადებული რეგიონის მიწების რუსეთისთვის გადაცემის მცდელობა, არის უკანონო, ძალის არ მქონე და ბათილი", — წერია განცხადებაში.

რა ელის ბიჭვინთის აგარაკს: ბიჭვინთაში მდებარე სახელმწიფო აგარაკების კომპლექსი, რომელიც 1958-1961 წლებშია აშენებული, რუსეთს 49-წლიანი იჯარით მისცეს.

შესაბამისი გადაწყვეტილება მიიღო ოკუპირებული აფხაზეთის ე.წ. პარლამენტმა და "დადგენილებას" ე.წ. პრეზიდენტის, ასლან ბჟანიას ხელმოწერა აქვს.

  • ამას სოხუმში პროტესტი მოჰყვა.
  • აფხაზეთის ე.წ. პარლამენტის შენობასთან, ბიჭვინთის აგარაკის რუსეთისთვის გადაცემის შესახებ შეთანხმების რატიფიკაციის მოწინააღმდეგეებმა შეკრება 26 დეკემბრის საღამოს დაიწყეს.

რა თქვეს შეთანხმების შესახებ თბილისში: საქართველოს პრეზიდენტმა, სალომე ზურაბიშვილმა რუსების მიერ საქართველოს მიწების მორიგი მიტაცება და მცოცავი ანექსიის პოლიტიკა დაგმო. განცხადება გაავრცელა საგარეო საქმეთა სამინისტრომაც.

  • სალომე ზურაბიშვილი, საქართველოს პრეზიდენტი: "ხალხის ძლიერი რეაქცია, რომელსაც ჩვენ ბიჭვინთის აგარაკის გადაცემის გარშემო ვხედავთ, ოკუპაციის პირდაპირი შედეგია. მოვუწოდებ საერთაშორისო საზოგადოებას ძლიერი და სასწრაფო რეაგირებისკენ", — დაწერა X-ზე სალომე ზურაბიშვილმა.

  • საქართველოს საგარეო საქმეთა სამინისტრომ თქვა, რომ ამ შეთანხმების რატიფიკაცია მორიგი უკანონო ქმედებაა და რუსეთის მიერ საქართველოს განუყოფელი რეგიონების ოკუპაციის პოლიტიკას აგრძელებს.

  • "საერთაშორისო სამართლებრივი თვალსაზრისით ნებისმიერი მსგავსი სახის ე.წ. შეთანხმება იურიდიული ძალის არმქონე და ბათილია. შესაბამისად აფხაზეთის რეგიონის ოკუპაციის პირობებში ტერიტორიის გადაცემაზე გაფორმებულ ე.წ. შეთანხმებას ვერ ექნება რაიმე სახის სამართლებრივი შედეგი", — წერია საგარეო უწყების მიერ გავრცელებულ განცხადებაში.

გაიგე მეტი: რას ითვალისწინებს შეთანხმება