სეთ როგანის მიერ პრეზიდენტ ტრამპის სამეცნიერო პოლიტიკის მიმართ გამოთქმული კრიტიკა, წლიური სამეცნიერო დაჯილდოების სრული ვერსიიდან ამოჭრილია — ამის შესახებ The Hollywood Reporter იუწყება.

The Hollywood Reporter, რომელიც ღონისძიების სპონსორებს შორისაა, წერს, რომ როგანი ერთ-ერთი წამყვანი გახლდათ ამ თვეში გამართულ Breakthrough Prize-ის ცერემონიაზე — მაღალპროფილურ დაჯილდოებაზე, რომელიც აღიარებს „გამორჩეულ სამეცნიერო მიღწევებს“ და რომლის თანადამფუძნებლებს შორის არიან გუგლის თანადამფუძნებელი სერგეი ბრინი და მეტას აღმასრულებელი დირექტორი მარკ ზაკერბერგი. ღონისძიება საკუთარ თავს სამეცნიერო „ოსკარს“ უწოდებს.

მსახიობ ედვარდ ნორტონთან ერთად, როგანმა ფუნდამენტური ფიზიკის მიმართულებით სპეციალურ ჯილდო გადასცა ჰერარდუს ტ’ ჰოოფტს. აუდიტორიისადმი მიმართვისას, რომელშიც ბრინი, ზაკერბერგი, ამაზონის დამფუძნებელი ჯეფ ბეზოსი და OpenAI-ის აღმასრულებელი დირექტორი სემ ოლტმანი იყვნენ, როგანმა, როგორც ჩანს, მიანიშნა ილონ მასკზე (რომელიც ცერემონიას არ ესწრებოდა), როცა თქვა:

„გასაოცარია, რომ ამ ოთახში მყოფმა ზოგიერთმა ადამიანმა დააფინანსა იმ ადამიანის არჩევა, ვინც გასულ კვირაში ცალი ხელით გაანადგურა მთელი ამერიკული მეცნიერება. შეუძლებელია არ გაგაოგნოს, რომ მეცნიერება შეიძლება დაანგრიო 320 მილიონი დოლარით და რობერტ კენედი უმცროსით — და თან ძალიან სწრაფად.“

თუმცა ეს კომენტარი არ აღმოჩნდა იმ 99-წუთიან „სრულ“ ვიდეოში, რომელიც Breakthrough Prize-მა იუთუბზე და საკუთარ ვებგვერდზე გამოაქვეყნა.

The Hollywood Reporter-თან განცხადებაში დაჯილდოების ფონდმა აღნიშნა: „წელს ცერემონია წინა წლებთან შედარებით უფრო ხანგრძლივი იყო და რამდენიმე მონაკვეთი დაგეგმილ დროში ჩასატევად ამოიჭრა.“

ტრამპის ადმინისტრაციის შეტევა აშშ-ის სამეცნიერო ინსტიტუტებზე გრძელდება. მარტში 1,900 მეცნიერმა მოაწერა ხელი ღია წერილს, რომელშიც ტრამპის ადმინისტრაციის მხრიდან უნივერსიტეტებისა და ფედერალური გრანტების მიმართ განხორციელებული მუქარები, დაფინანსების შემცირება, მასობრივი გათავისუფლებები, გადადგომები და ცენზურა დაგმეს.

მასკმა ტრამპის ხელახალი არჩევნების კამპანია თითქმის 300 მილიონი დოლარით დააფინანსა და მოგვიანებით დაინიშნა „სპეციალურ სამთავრობო თანამშრომლად“ მისიით — შეემცირებინა სახელმწიფო უწყებები ხარჯების დაზოგვის მიზნით. რობერტ კენედი უმცროსი — აშშ-ში ვაქცინების მიმართ ერთ-ერთი ყველაზე ცნობილი სკეპტიკოსი — თებერვალში ჯანმრთელობის მდივნად დაინიშნა და, სხვა სადავო ნაბიჯებთან ერთად, ადანაშაულებენ იმაში, რომ ამერიკელებს „ცრუ იმედი“ ჩაუსახა, თითქოს აუტიზმის გამომწვევი მიზეზი 2025 წლის ბოლომდე იქნებოდა აღმოჩენილი.

ზაკერბერგმა, ბეზოსმა და ოლტმანმა ასევე თითო მილიონი დოლარი შესწირეს ტრამპის ინაუგურაციის კომიტეტს.