17 აპრილს, კულტურის სამინისტროსთან საპროტესტო აქცია გაიმართება.

"17 აპრილს, 15:00 საათზე აქცია კულტურის სამინისტროსთან რეპრესიების წინააღმდეგ! აქ უნდა იყოს ყველა, ვისაც მართლა რამე ნამუსის მსგავსი შერჩა!", — წერს რეჟისორი დათა თავაძე სოციალურ ქსელში და საზოგადოებას აქციაზე მოსვლისკენ მოუწოდებს.

აქციის ორგანიზატორები ოცნების ხელისუფლების დაქვემდებარებაში მყოფი კულტურის სამინისტროს მიერ ვასო აბაშიძის სახელობის მუსიკისა და დრამის თეატრის ("ახალი თეატრი") ხელმძღვანელის თანამდებობიდან დავით დოიაშვილის გათავისუფლებას აპროტესტებენ. ინფორმაცია დოიაშვილის გათავისუფლების შესახებ გუშინ, 16 აპრილს გავრცელდა, რის შემდეგაც "ახალ თეატრთან" სპონტანურად აქცია გაიმართა, სადაც თეატრის მსახიობებმა განცხადება გაავრცელეს. ისინი ამბობენ, რომ "არალეგიტიმური კულტურის სამინისტროს გადაწყვეტილებას არ აღიარებენ და დავით დოიაშვილს არ უშვებენ".

"დღეს არალეგიტიმურმა კულტურის სამინისტრომ ახალი თეატრის სამხატვრო ხელმძღვანელის თანამდებობიდან გაათავისუფლა დავით დოიაშვილი, რადგან მან გაბედა და ხმა აიმაღლა იმ უსამართლობის წინააღმდეგ, რის წინაშეც საქართველოს ნებისმიერი მოქალაქე ვდგავართ. დავით დოიაშვილზე თავდასხმა არის თავდასხმა თითოეულ ჩვენგანზე, ეს არის დასჯა სოლიდარობისთვის, თანადგომისთვის, თავისუფალი აზრისთვის და თავდასხმა თითოეულ ხელოვანზე, რომელიც ემსახურება ხალხს და სახელმწიფოს.

ჩვენ, ვასო აბაშიძის სახელობის ახალი თეატრის დასი, რომლის წევრიც უსამართლო ტყვეობაშია ამჟამად, წინსვლას და განვითარებას დავით დოიაშვილის ხელმძღვანელობის გარეშე ვერ ვხედავთ, არ ვაღიარებთ არალეგიტიმური კულტურის სამინისტროს გადაწყვეტილებას და ჩვენ, ამ თეატრის დასი დავით დოიაშვილს არ ვუშვებთ. ვდგავართ მასთან ერთად და ვიდგებით გამარჯვებამდე", — ნათქვამია ახალი თეატრის დასის განცხადებაში.