დისნეის უახლეს კინოადაპტაციას ფიფქიას ლიბანში არ უჩვენებენ. მიზეზი ფილმში ისრაელელი მსახიობის, გალ გადოთის, მონაწილეობაა, რომელიც ბოროტ ჯადოქარს ასახიერებს.

კინოთეატრებში ფიფქიას ჩვენების აკრძალვის ბრძანება ლიბანის შინაგან საქმეთა მინისტრმა ჰეზბოლაზე ისრაელის მიმდინარე თავდასხმების ფონზე გასცა. არაერთი ქვეყნის მიერ ტერორისტულ დაჯგუფებად გამოცხადებულ ჰეზბოლაზე შეტევას ლიბანში მშვიდობიანი მოქალაქეების სიცოცხლეც ემსხვერპლა.

თუმცა, შუა აღმოსავლეთის რეგიონში დისნეის ფილმების დისტრიბუტორი კომპანია აღნიშნავს, რომ დიდი ხანია, რაც გალ გადოთი ლიბანის "ბოიკოტის სიაშია" და ქვეყანაში იკრძალება მსახიობის მონაწილეობით გადაღებული ნებისმიერი ფილმის თუ სერიალის ჩვენება.

ფოტო: Disney

გადოთი, რომელიც ისრაელში დაიბადა და ქვეყნის თავდაცვის ძალებშიც მსახურობდა, საერთაშორისო ასპარეზზე თავისი სამშობლოს აქტიური მხარდამჭერია. 2023 წლის 7 ოქტომბრის ტერაქტის შემდეგ, მსახიობი სოციალურ ქსელში ხშირად ეხმაურებოდა მიმდინარე კონფლიქტს ახლო აღმოსავლეთში.

"ვერასდროს წარმოვიდგენდი, რომ ამერიკის და მსოფლიოს სხვადასხვა ქალაქის ქუჩებში ვიხილავდით ადამიანებს, რომლებიც არათუ გმობენ ჰამასს, არამედ ზეიმობენ, ამართლებენ და ტაშისკვრით ხდებიან ებრაელების ხოცვას", — განაცხადა გადოთმა ანტისემიტიზმთან მებრძოლი ორგანიზაციის, Anti-Defamation League-ის, ყოველწლიურ სამიტზე.

მისი პოზიციის გამო, გადოთი ბოლო ხანებში არაერთხელ გააკრიტიკეს. რამდენიმე კვირის წინ, პროტესტის ფონზე გაიხსნა მისი ვარსკვლავიც ჰოლივუდის დიდების ხეივანში.

საპროტესტო მსვლელობები უძღოდა წინ ფიფქიას ხმაურიან საპრემიერო კვირასაც. გადოთთან ერთად, ფილმში რეიჩელ ზეგლერი მონაწილეობს, რომელსაც პალესტინის მიმართ არაერთხელ გამოუხატავს მხარდაჭერა. ინტერნეტში კი ვარაუდობენ, რომ განსხვავებული პოზიციების გამო, გადოთსა და ზეგლერს შორის ურთიერთობა დაიძაბა.

გადოთი დისნეის ერთადერთი ვარსკვლავი როდია, რომელიც ისრაელის მხარდაჭერის გამო კრიტიკის ქარცეცხლში გაეხვა. წინა თვეში პალესტინის მხარდამჭერი დემონსტრანტები კაპიტანი ამერიკა: საოცარი ახალი სამყაროს პრემიერაზე შეიკრიბნენ და ფილმში ისრაელელი სუპერგმირის, საბრას, გამოჩენა გააპროტესტეს. მარველის ფილმში ამ პერსონაჟს ისრაელელი მსახიობი შირა ჰაასი ასახიერებს. ჰაასის მონაწილეობის გამო, ლიბანში საოცარი ახალი სამყაროს ჩვენებაც აიკრძალა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...