"არ ვეთანხმები გირაოს დაწესებას და არ ვაპირებ მის გადახდას", — ამის შესახებ პრესკონფერენციაზე აზერბაიჯანელემა ჟურნალისტმა აფგან სადიგოვმა თქვა. მისი თქმით, ილჰამ ალიევმაც და ირაკლი კობახიძემაც საკუთარი ქვეყნების ბიუჯეტები გააჩანაგეს და თვითონ გურაოს არ გადაიხდის.

"არ ვეთანხმები გირაოს დაწესებას და არ ვაპირებ მის გადახდას. ვფიქრობ ალიევმაც და კობახიძემაც საკუთარი ქვეყნების ბიუჯეტი გააჩანაგეს და არ ვაპირებ ამ გირაოს გადახდას", — განაცხადა სადიგოვმა.

მან პრესკონფერენციაზე მადლობა გადაუხადა ქართველ და აზერბაიჯანელ ჟურნალისტებსა და უფლებადამცველებს მხარდაჭერისთვის და თქვა, რომ დიქტატორები არასოდეს გამოსწორდებიან.

"ყოველ ჯერზე, როდესაც მე აზერბაიჯანში მაკავებდნენ, ისინი ჩემს ოჯახს აშანტაჟებდნენ და ჩემი მცირეწლოვანი შვილების მკვლელობით იმუქრებოდნენ. ყოველი მსგავსი შემთხვევის დროს მე მივმართავდი ალიევს, რომ ეს ჩემი ბრძოლაა და ოჯახს შეეშვან. სამწუხაროდ, დიქტატორები არასოდეს გამოსწორდებიან", — თქვა სადიგოვმა.

16 აპრილს თბილისის საქალაქო სასამართლომ დააკმაყოფილა პროკურატურის შუამდგომლობა და აფგან სადიგოვისთვის გამოყენებული საექსტრადიციო პატიმრობა 5000-ლარიანი გირაოთი შეცვალა, რის შემდეგაც ის პატიმრობიდან გათავისუფლდა.

აზერბაიჯანელი ჟურნალისტი, აფგან სადიგოვი საქართველოში 2024 წლის 3 აგვისტოს დააკავეს. აფგან სადიგოვს აზერბაიჯანში მიმდინარე გამოძიების საფუძველზე გამოძალვის ორ ეპიზოდს ედავებოდნენ.

სადიგოვი 12 სექტემბრიდან 161 დღე შიმშილობდა. 2025 წლის 14 იანვარს ადამიანის უფლებათა ევროპულმა სასამართლომ შუალედური გადაწყვეტილება მიიღო, რომლის მიხედვითაც აზერბაიჯანელი ჟურნალისტის აფგან სადიგოვის აზერბაიჯანში ექსტრადირება იკრძალება. ამის შემდეგ სადიგოვმა შიმშილბა შეწყვიტა.