საზოგადოებრივი მაუწყებლის ეთერში ნაციონალური მოძრაობის საქმიანობის შემსწავლელი დროებითი საგამოძიებო კომისიის თავმჯდომარემ და ქართული ოცნების პარლამენტის ვიცე-სპიკერმა, თეა წულუკიანმა განაცხადა, რომ 2008 წლის ომში დაღუპული გიორგი ანწუხელიძე მიხეილ სააკაშვილის პიარისთვის "უაზროდ გაიწირა" .

"მარტივ ენაზე რომ ვთქვა, რატომ არ არის დღეს გიორგი ანწუხელიძე სახლში? მე მაქვს ჩემს თანამებრძოლებთან ერთად უფლება დავსვა ეს კითხვა. ვინ ამიკრძალოს ამ კითხვის დასმას, ვერავინ. ამ კითხვას ვსვამთ — ყველა ბავშვს სჭირდება თავისი მშობელი სახლში და არა უაზროდ განწირული ვიღაცის პიარისთვის. ამ შემთხვევაში სააკაშვილს ვგულისხმობთ," — განაცხადა თეა წულუკიანმა.

წულუკიანმა ისიც თქვა, რომ "გაერთიანებული შტაბების ხელმძღვანელმა [ზაზა გოგავამ] საომარი მოქმედებიდან არ გამოიყვანა მშვიდობიანი მოსახლეობა, რადგან მას ასე დაავალა სააკაშვილმა".

"გაერთიანებული შტაბების ხელმძღვანელმა არ გამოიყვანა მშვიდობიანი მოსახლეობა, რადგან მას ასე დაავალა სააკაშვილმა [...] იმიტომ, რომ შემდეგ ლამაზად უნდა დამდგარიყო ტრიბუნასთან და ეთქვა რომ შეხედეთ ხალხო, მსოფლიო, შეხედეთ რუსეთი რა ბოროტია, თითქოს გვჭირდება ჩვენ ვინმეს ამის ახსნა, ვინ არის რუსეთი", — განაცხადა წულუკიანმა.

ოცნების პარლამენტის ვიცე-სპიკერმა დაამატა, რომ ზაზა გოგავამ კომისიის სხდომაზე ხმა აიმაღლა, რაც არ "დაითმინა". მისი თქმით, გოგავა "ისე უწევდა ხმას, გეგონება მოგებული ომის გენერალი იყოს".

შეგახსენებთ, 27 მარტს ენმ-ს ხელისუფლების საქმიანობის შემსწავლელ დროებით საგამოძიებო კომისიაში 2008 წლის ომს განიხილავდნენ. კომისიის მდივან სოზარ სუბარის თქმით, არსებობს ინფორმაცია, რომ იარაღის ნაწილი, რომელიც საქართველოში შემოვიდა, გამოუსადეგარი იყო საბრძოლო მოქმედებებისთვის, რაზეც გაერთიანებული შტაბის ყოფილმა უფროსმა, გენერალმა ზაზა გოგავამ უპასუხა, რომ ეს არის "ძალიან ცუდი ბრალდება".

"ძალიან ცუდი ბრალდებაა, მეორედ არ გაიმეოროთ! არასწორი ბრალდებაა ნებისმიერ სამხედროსთან! მომიყვანეთ ნებისმიერი სამხედრო, დამელაპარაკოს, რა არ ვარგოდა, რა ეჭირათ და რით დაამთავრეს ომი?! ასე არ შეიძლება ადამიანის ამოთხვრა ტალახში, ზოგიერთმა თავისი დეზერტირობა და მაიმუნობა რომ დამალოს!", — განაცხადა გოგავამ.

• ზაზა გოგავა: "გამორიცხული იყო [ომის თავიდან აცილება]"

28 მარტს, პარლამენტთან, მოქალაქეები შეიკრიბნენ, რათა თეა წულუკიანის კომისიის მიერ 2008 წლის ომის გმირების შეურაცხყოფა გაეპროტესტებინათ. პოლიციამ აქციის 2 მონაწილე თაკო კურატიშვილი და ლილუ შაველაშვილი დააკავეს. დაკავების მომენტში თაკო კურატიშვილი ხელში ბანერი ეჭირა წარწერით — "ანწუხელიძე უკვდავია".

ასევე იხილეთ:

• წულუკიანის კომისია 2008 წლის ომზე, ხაინდრავას "შუა თითი", დაკავებული "ანწუხელიძე უკვდავია"-ს ბანერით — 28 მარტის პროტესტის ქრონიკა